Ullut

Sumi: Hans Lynge Sal
Ulloq:
Pisigit
Sumi: Hans Lynge Sal
Ulloq:
Pisigit
Sumi: Hans Lynge Sal
Ulloq:
Pisigit

Qaammatip Ernera

Imaa

Hans Henrik ”Suersaq” Poulsen isiginnaagassiami nipilersornertalimmi pissanganartuliami kalaallisuumi ”Qaammatip Ernerani” pingaarnertut innuttaassaaq.

Isiginnaartitsisartutut pikkorissoq Hans Henrik ”Suersaq” Poulsen, kalaallisut isiginnaagassiami pissanganartuliami nipilersornertalimmi ”Qaammatip Ernerani”, Kulturip Illorsuata Katuap ukiut 20-ngortorsiorlugit nalliuttorsiorneranut atatillugu suliarineqartumi, pingaarnertut inuttaassaaq. Isiginnaagassiaq takuteqqaarneqassaaq juunip aappaani, takuteqqinneqassallunilu pingajuani aamma juunip sisamaani. Tamatuma kingorna Qaammatip Ernera Sisimiuni, Uummannami, Ilulissani, Narsami, Qaqortumi aamma Tasiilami takutinneqassaaq.

Oqaluttuaq

H.H. ”Suersaq” Poulsenip inuttaaffigaa angut inuusuttoq Pavia, nunatsinni illoqarfeerannguami aanakkumini alliartorsimasoq, angajoqqaami tamarmik toqukkut qimagunnerisa kingorna – ataataa imaani ajunaarluni, anaanalu qallunaamik sulisartumik angutaatitaarluni Danmarkimut aallaaraluarluni Københavnimi illut tunuini illoqannginnersami toqusimalluni. Naak Pavia aanakkumini kalaallit ileqqutoqaat malillugit alliartoraluarluni, allarluinnarnik siunissaminut takorluugaqarpoq. Danskisut ilinniagaqalerusuppoq, ingeniørinngorluni, ikaartarfissuarnillu sanasalerusulluni. Aanakkuisa akkaatalu sapinngisartik tamaat aallaqqunngikkaluarpaat, anaanagigaluamisut qallunaanut silaarunnissaa pinaveersaartinniaraluarlugu, sumit kingoqqisuunini kalaalliuninilu puiornaveersaartariaqarmagit. Palasilli Christian Drachardtip kalaallit kulturitoqaannik suusupaginnittup Pavia aallarusunneranik tapersersorpaa. Paviap siunniussani aalajangiusimaannarpai Danmarkiliarniarlunilu. Akkaata aanaakkuisalu inuulluaqqullugu serravaat aarnuassaanillu tunillugu. Danmarkili Paviap takorloorsimasaatut inngilaq, danskit takornartatut nikanartutut ammut isigaat, Paviallu danskit kulturiat quiasaarutaallu paasisinnaanngilai.

Ingeniørinngorniarfimmi ingerlanerliorpoq, ajorsartutullu misiginerata imigassamut atornerluinermullu saatippaa, kalaallinik ikinngutigiligaanik arnamillu anguserituumik ikiorneqarluni. Pavia ammuinnaq aallarpoq takorluuisalerlunilu. Oqaluttuatoqqani uumasorujuit meeraalluni tusartarsimasani aliortukkatut takkussuupput – tamarmillu isussualuffigaat atorsinnaanngivissoq. Anaanakkuisa toqoreersimasut tarnigi takkupput, toqusimasullu inaannut ilageqqullutik kimigiiserfigilerlugu. Aarnussamili kimia piumassuseqarluarnermigullu Pavia akiuuppoq inuunerlu qinerlugu.

Isiginnaartitsisut tallimat inuttaaffiilu

Inuttaaffinni allani Majbritt Bechip arnap inuttaaffiit tamaasa inuttaaffigai – Paviap aanaaja Piillaat, arabiamiu arnaq Danmarkimut nunasisut qitornaat Josefini, anguseritoorlu Rosina. Georg Olsenip Paviap aataaja Moortat inuttaaffigaa, aamma Abdoullaasuusaarluni, Piitaasaarlunilu imerajuttoq. Kristian Mølgaardip Paviap akkaa Kiiooq inuttaaffigaa, aamma Moussa politeerlu qallunaaq. Klaus Geislerip inuttaaffigai palasi Christian Drachardt, aamma Henrik, politiillu radioani oqaluttuulluni.

Nipilersortut tallimat igiortigalugit

Isiginnaagassiaq tusarnaagassiaatigisoq sisamanik annernik immikkoortortaqarpoq 14-inik immikkootuaralinnik. Isiginnaartitsinerit akornanni erinarsortoqartarlunilu nipilersortoqartarpoq. Isiginnaartitsisut tallimat isiginnaartitsiutigalugit erinarsortuupput, nipilersoqatigiinnik tallimanik inuttalimmik igiorneqarlutik. Nipilersortuupput kapelmester Leif S. Immanuelsen, pattagissat aamma supputaasaq, Titken Jakobsen saxofoni aamma klarinit, Jaqqa J. Petersen guitari, Kristian Herlufsen bas, Nino Fenckerilu tumerparpaat. Isiginnaartitsisut nipilersortullu imminnut tulleeqattaarput, Juaakalu Lyberthillu taalliai erinniaalu ”Oqaluttuat”-neersut naalisakkat nutaamillu aaqqissuussat erinarsuutigineqarput.

Peqataasut allat

Isiginnaagassiatut nipilersornertalittut pissanganartuliartut ”Qaammatip Ernera” allanneqarpoq danskimit ilitsersuisartumit Jacques S. Matthiessenimit Juaaka Lyberthimillu, imaatalu tunngavigai Juaaka Lyberthip 1983-imi nuussualiaani ”Oqaluttuani” erinnat taallallu, nunatta oqaluttuassartaanik nutaanerusumik imaqartut. Jacques S. Matthiessen pissanganarsaasuullunilu ilitersuisuuvoq, Islandimiu Rebekka Autsmann Ingemundardóttir isiginnaartitsivimmi ilusilersuisuulluni. Isiginnaartitsisut atisaanik mersortuuvoq kalaaleq mersortartoq Parnuuna K. Thornwood, Naleraq Eugenius qullilersuisuulluni, Hans-Ole Amossenilu nipilerisuulluni.

Nipilersukkanik isiginnaagassiaq nalitsinni annerpaaq

Qaammatip Ernera nunatsinni nipilersornertalimmik isiginnaagassiani Kulturip Illorsuata Katuap suliarititaani suliat annersaraat. Aningaasaliisut arlalissuit ikiuunnerisigut isiginnaagassiaq Sisimiuni, Uummannami, Ilulissani, Narsami, Qaqortumi aamma Tasiilami takutinneqassaaq, soorunami aamma Nuummi Katuami. Isiginnaartoqarluni misilinnissaa ilanngukkaanni Qaammatip Ernera junimi quleriarluni takutinneqassaaq.

Utoqqalinersiallit aamma inuusuttut ilisimatusartut misiliinissamut kingullermut qaaqqusaassapput

Isiginnaagassiap misilinnissaanut kingullermut Nuummi utoqqalinersiutillit, aamma Ilisimatusarfimmi inuiaqatigiilerinermut ilisimatusartut Nuummilu nipilersornermut ilinniarfimmi atuartut angajulliit qaaqquneqassapput. Inissalli killeqarmata qaaqqusat isissutissaminnik Katuap saaffiginnittarfianut aalleqqaartussaapput, tamanna maajip 18-ani aallartissaaq. Nuummili isiginnaariarusuttut periarfissaqarluartusssapput, tassa 2., 3. aamma 4. juni Qaammatip Ernera Katuami takutinneqassammat. Sisimiuni Taseralimmi 8. juni takutinneqassaaq, Uummannap timersortarfiani 10. juni, Ilulissat timersortarfiani 14. juni, Narsami 18. juni, Qaqortumi 21. juni, Tasiilamilu 25 juni.

Inuttai

Pavia. Pingaarnertut inuttaq, taassuma angalanera malinnaaffigaarput.

Piillaat. Paviap aanaa

Moortat, Paviap aataa

Christian Dracharht, palasi.

Kiiooq. Paviap akkaa, qilaasersortartut inuk imaannaq inngitsoq.

Oqalualaap inuttaa: Aningaannguaq – Qaammatip ernera.

Uumasut allat: affarmik nanoq affarmik inuk, allallu.

Inuttat allat

Københavnimi ikinngutai ilinniaqataalu: Henrik, Moussa, Abdoulla, Josefine.

Københavnimi imerajuttoqatai: Rasmus, Piitaq, Puk.

Politeeq qallunaaq.

Nipi politiradiukkut.

Anaanaata ataataatalu tarnigi aliortukkallu allat.

Isiginnaartitsisut

Hans Henrik ‘Suersaq’ Poulsen

Majbritt Bech

Kiiu Olsen

Kristian Mølgaard

Klaus Geisler

Nipilersortut

Leif S Immanuelsen - nipilersortuni aqutsisoq, pattagissat, nutsugiaq

Kristian Herlufsen - bas

Jaqqa J. Petersen – kitaari

Titken A. Jakobsen – saxofon, klarinet il.il.

Nino Fencker – tumerparpaat

Peqataasut allat

Scenografi: Rebekka Autsmann Ingemundsdóttir

Atisat: Parnuuna K Thorwood

Nipilerisoq: Hans Ole Amossen

Qullilerisoq: Naleraq Eugenius.

Teknik: Eigil Petersen

Suliap allaffissornera

Julia Pars, Anton Overballe.

Suliarititsinermi angallassinermilu ittu: Juaaka Lyberth

Suliarititsisoq: Katuaq – Grønlands Kulturhus - 2017.

Angalaneq

« Qaammatip Ernera » vises i byerne Nuuk, Sisimiut, Uummannaq, Ilulissat, Narsaq, Qaqortoq og Tasiilaq.

Aningaasaliisut