Ullut

Sumi: Paarlersuaq
Piffissaq:

Akeqanngilaq

Taamallu ilisumik siullermeersumik Kunngikkormiut Kalaallit Nunaanni imminneq suliaannik takutitsisoqassaaq.

Dronningi Prinsilu inuusuttunnguunerminniilli avatangiisimi pappialanut, qalipaaffissianut aammalu plastik atorlugu qalipaallunilu ilusilersuinikkut takussutissiarineqarnissaat soqutigisarisimavaat. Dronning-ip eqqumiitsuliatut suliarpassuini Kalaallit Nunaannut angalasarneri annertuumik isumassarsiorfittut aallerfiusarsimapput. Ilaat pilersinneqarsimapput qalipaatit imilertakkat qalipaatillu allat atorlugit suliatut, ilaallu angalanermit piviusorsiorpalaartumik qalipaganngorlugillu titartaganngortinneqartarsimapput. Soorlu 1997-imi aammalu Kunngip umiarsuaanik 2004-mi Prinsi Kunngissaq nulialu kateqqammersut angalaqatigalugit ingerlaarnermi, Ittoqqortoormiit tungaanut sinersorluni ingerlanermi qanittuani sineriammi takusani Dronning-ip qalipaatit imilertakkat atorlugit puigunaatsunngorlugit qalipassimavai, kingornalu suliani Kunngissamut nulianullu tunissutitut tunniussimallugit. Tamakkuuppullu ilaatigut aasarpat Katuami suliat takuneqarsinnaasut ilagiumaagaat.




Assiliisoq: Leiff Josefsen

Prins Henrik annertunerusumik qiperuilluni ilusilersuinermik suliaqartarsimavoq 1980-innikkunniillu aamma angissutsimikkut assigiinngitsorpassuarnik ilusilersuisarsimalluni. Naallu suleriaaseq atorsimasaa afrikamiut asiamiullu eqqumiitsulioriaasiannik aallaveqaraluartoq bronzenngorlugit suliaasa ilai suliarineqarnermikkut kalaallit tupilaliarisartagaannut eqqaanartuupput. Tamakkulu tassaapput suliat ilaatigut Katuami takuneqarsinnaajumaartut.

Kingullermik Prins Henrik-up 2013-imi Katuami saqqummersippai tupilaat katersaatini. Saqqummersitsineq taanna ateqartinneqarpoq ”Kalaallit Nunaannut asanninnera pillugu”. Taannalu Katuami saqqummersitsisarnerni ornigarneqarnerpaajunikuuvoq naatsorsuutigineqarluni inunnit 2.000-it missinginit alakkaterneqarsimasoq, Katuami pisortaq Julia Pars oqaluttuarpoq.

Katuamit qilanaarutigineqarpoq saqqummersitsinissap tamanut ammasumik takutinneqarnissaa. Saqqummersitsinerillu takusarneqarsinnaasassapput Katuap nalinginnaasumik ammasarfiisa iluini.

Aningaasaliisut