Katuamit periusissiaq erseqqissarneqarpoq takorluukkanik nutaanik naleraliinikkut, taasamik:
Piorsarsimassuseq . Nukittortitsisoq . Inuiaqatigiinnut
Culture . Strengthens . People
Kulturen. Styrker. Mennesker
Takorluukkap taassuma oqartiartuutigivaa suleqatiinneq imaammat, tassa piorsarsimassutsip inuk nukittorsartarlugu inuullu piorsarsimassutsimik nukittorsaasarluni. Tamannarpiaavorlu Katuap piorsarsimassutsimut illorsuartut sulinermini sunniutitut takutikkumasaa, siulersuisuni siulittaasoq Anna Heilmann oqarpoq. Takorluugaq ersersinneqarniarpoq kalaallit qilaata qitiutillugu ilisarnaasiornikkut.
Katuami periusissiorluni sulinermut atatillugu pingaarnertut siunnerfimminik imaattunik saqqummiussivoq:
- Illoqarfiit pingaarnersaata periusissiaanut atatillugu innuttaasunut piorsarsimassutsimik tunngaveqartutitut sassaalliuteqarfiginerini, siammasissunik aaqqissuussinikkut pisoqartitsisarnikkullu, tunniussaqarniarluni
- Sinerissami piorsarsimassutsimik suliniarfiit suliaqartullu suleqatiginerat nukittorsarlugu
- Pisussanik aaqqissuinerit pilersaarutillu iluini immineq piorsarsimassutsimik inuit ataasiakkaat, aningaasaliisartut allallu ingerlatsiviusut suleqatiginerinik nukittorsaajumalluni
- Kalaallit Nunaanni, Nunani Avannarlerni Canadamilu piorsarsimassutsikkut suliniaqatigiiffiit aqqissuussisartullu suleqatiginerulerlugit peqatigalugillu avammut attaveqarneq ineriartortillugu
- Piorsarsimassutsikkut misigisat pillugit ilisimasaqarneq qafassarlugu gl–imi imarisaasut allatigullu avammut attaveqaatit oqaatsit pisariaqartutut isigisat atorlugit ingerlaavartumik nutartertarnerisigut
- Siunnerfilersugaalluartumik pisoqartititsisarnikkut takornarianut sammisut nukittorsarlugit
- Piorsarsimassuseq aallavigalugu neqerooruteqarnerni meeqqanut, inuusuttunut inersimasunullu saaffiginninnerit erseqqinnerulersillugit.
Katuaq ukiuni kingulliunerusuni nunatta sinnerani illoqarfinnut Nuup avataaniittunut siammartiteraluni angalatitsisarnini nukittunerulersissimavaa, 2018-imilu Katuamit kissaatigineqarpoq illoqarfiit allat piorsarsimassutsikkut paarlaasseqatigiittarnikkut, assigiinngitsutigut attaveqarluarnerulernikkut aammalu piginnaaninngorsaalluni inerisaanikkut suleqatiginerulernissaat.