Aaqqissuinermut immikkoortortaqarfimmut nipilersornerup iluani ataqatigiissaarisussarsiorpoq

Katuaq suliffeqarfiuvoq pissanganartoq, eqeersimaartoq assigiinngitsorpassuarnik ukioq naallugu sammisaqartitsisartoq tikeraarpassuaqartartorlu.

Katuaq naleqartitai makkuupput: Pitsaassuseq, Ataatsimooqatigiinneq, Pilersitsillaqqissuseq, taakku tamarmik sulinermut aallaaviusarmata.

Katuami sulisut eqqumiitsuliortunik, kulturikkut aallutaqartunik, kattuffinnik, suliffeqarfinnik, najugaqartunik nunanillu allanit tikeraanik allarpassuarnillu suleqateqartarpugut.

Atorfik pillugu

Nipilersornerup iluani ataqatigiissaarisoq aaqqissuinermut immikkoortortaqarfimmiissaaq, taamaattoq ulluinnarni Katuamiittut tamaasa attaveqarfigisassavai , ingammik teknikimut tunngasunut immikkoortortaqarfik aamma cafémut ataatsimiisitsisarnermullu immikkoortortaqarfik.

Suliassat annerpaartaat Katuami nipilersornermut tunngasunut pilersaarusiornermiippoq, aamma nipilersortartut bookerillu attaveqarfigisarlugillu isumaqatigiinninniuteqarfigisarlugit, illup iluani ataqatigiissaarineq suleqatigisartakkanullu allanut.

Immikkut ujartorparput nipilersornerup iluani ataqatigiissaarisartussaq kalaallit nunanilu tamalaat akornanni nipilersoriaasiannut ilisimasalik, nipilersortoqassatillugu aaqqissuussinermik misilittagaqarluartoq nalinginnaasumillu kulturikkut malunniuteqartuullunilu ilisimasaqarluartoq.

Nipilersornerup iluani ataqatigiissaarisoq aaqqissuinermut immikkoortortaqarfimmi pisortaq qullersaralugu Katuamilu immikkoortortaqarfiit qanimut suleqatigalugit makkuninnga isumaginnittuussaaq:

  • Aaqqissuinermut immikkoortortaqarfik suleqatigalugu kulturikkut sammisaqartitsinerit pilersaarusiorlugillu naammassisassavai, kulturikkut suleqatigisat soqutigisaqartullu ataavartumik attaveqarfigisarlugit.
  • Kulturikkut sammisaqartitsinerit suliniutillu qanoq ikkaluartulluunniit siuttuuffigisarlugit, tassani nipilersorneq immikkut sammisaralugu.
  • Illorsuup iluani avataanilu kulturikkut sammisaqartitsinermi paasissutissiisarnermut peqataasarneq.

 

Ilinnut piumasaqaativut

  • Suleqateqarluarsinnaasuussaatit sulinerillu aaqqissuussaalluakkamik ingerlattassavat.
  • Suliatit ataatsikkuluutileraangata paatsiveeruttannginnissat.
  • Ineriartornissamut pingaartitsissaatit.
  • Unnukkut akunnerullu naanerani sulisarnissamut ammasuussasutit.
  • Kulturikkut illorsuarmi pikialaartitsivioqisumi ulapaarfiusaqisumilu sulissallutit kajumittuussaatit.
  • Namminersorlutit angusaqarumallutillu sulisinnaassaatit.
  • Suliniutinut aqutsisuusarneq misilittagaqarfigissavat.
  • Aningaasanut missingersuusiat aningaasaliineqarnissamullu qinnuteqaasiorsinnaasassaatit.
  • Kalaallisut qallunaatut tuluttullu oqalussinnaassaatit allassinnaallutillu
  • Kulturimut eqqumiitsuliornermut nipilersornermullu tunngasut ilisimasaqarfigalugillu soqutigisarissavatit.

 

Neqeroorutigaarput

  • Nunatsinni kulturikkut inuunermi qanimut suleqataanissaq
  • Suliffik pissanganartoq assigiinngiiaaqisunik suliassaqarfiusoq
  • Suliffimmi ineriartortinnissamut pingaartitsisumi sulineq
  • Ukiumut arlaleriarluni sulisunut aaqqissuussanut peqataasarnissaq

 

Atorfininnissamut piumasaqaatit

Aningaasarsiat piginnaasat naapertorlugit aalajangerneqassapput.

  

Qinnuteqaat

Qinnuteqaatit pisinnaasat pillugit paasissutissanik imallit, innersuussisinnaasunik minnerpaamik marlunnik paasissutissartallit aaqqissuussinermut pisortamut Jakob Søvndahl Skovaa, uunga eventmanager@katuaq.gl, piaartumik nassiunneqassapput kingusinnerpaamik ataasinngorneq 2. januar 2023.

Kikkuuvugut

Aaqqissuinermut immikkoortortaqarfimmi uku sulisoraavut, aaqqissuussinernut pisortaq, pisussanut ataqatigiissaarisoq, nipilersornermut tunngasunut ataqatigiissaarisoq , paasissutissaqarnermut ussassaarinermullu ataqatigiissaarisoq. Tamatuma saniatigut receptionimi filmertarfimmilu pisortaq, filminik inniminniisartoq, saqisut filmertitsisartullu.

 

Katuaq pillugu

Katuaq aningaasaateqarfiuvoq inuussutissarsiornermik ingerlataqartoq Kalaallit Nunaanni Kulturikkut Illorsuaq toqqammavigalugu Kalaallit Nunaanni kultureqarneq nunallu tamalaat akornanni kulturikkut attaveqaateqartarneq suleqateqartarnerlu aqqutigalugit avammut nittarsaasartoq. Katuaq namminerisamik filmertarfimmik cafémillu ingerlataqarpoq, soorlu aamma ataatsimiittarfiullutalu ataatsimeersuartarfiusugut tallimanik ullorialerneqarsimasoq. Katuaq peqatigiiffippassuarnik, suliffeqarfinnik, kattuffinnik inunnillu ataasiakkaanik kultureqarnerup iluani suleqateqartuuvoq. Katuamut aningaasaliisartuupput Namminersorlutik Oqartussat aamma Kommuneqarfik Sermersooq. Tamakku saniatigut Katuaq aningaasatigut tapersersorteqartarpoq Nunarput tamakkerlugu kulturikkut sammisaqartitsisarnermi tapiissuteqartartunik.

Paasissutissat allat:

Suliffissaq pillugu annertunerusumik paasissutissanik pissarsisinnaavutit aaqqissuussinernut pisortaq Jakob Søvndahl Skovaa,  mobil +299 54 71 94 imalt.  e-mail eventmanager@katuaq.gl.