2019-imi ukiumut angusaq naammaginartoq

Katuaq 2019-imi kulturikkut aaqqissuussinernik 60-inik puigunaatsunik namminerisamik pilersitsivoq, taakkua amerlanerpaartaat eqqumiitsuliortut kalaallit suleqatigalugit aammalu nammineq kulturi qitiutillugu ingerlanneqarput. Kulturikkut sammisat tassaapput nipilersorneq, qitinneq, isiginnaartitsineq, saqqummersitsinerit, oqalugiarnerit il.il. Taakkunannga 70%-it missaanniittut akeqanngillat aaqqissuussaallutillu tamanut ammasut.

• Angusaq naammaginartutut nalilerparput ukiorlu Katuamut misigisanik pitsaasunik pilersitsiffiusimasoq kingumut qiviaqqissinnaallugu, kulturikkut suliaqartut pikkorissut suleqatigalugit. Katuap inuinut qujanaq, kulturimut sulilluarlutik avatangiisitigut kiffartuussilluartunut, siulersuisuni siulittaasoq Pipaluk Kreutzmann Jørgensen oqarpoq.

Tapiisartunut, aningaasaliisartunut suleqatigisartakkanullu kulturikkut suliniutinik piviusunngortitseqataasartunut qujanarujussuaq.

2020-mut naatsorsuutigineqartut
Naak 2020 aallartilluaraluartoq, ilaatigut Unnuk Kulturisiornikkut, Piitannguaq Alaufesenip quiasaarinera, tusarnaartitsinerit il.il. covid-19-ip Katuaq martsip aallaqqaataata missaani unammillerpaa. Tamatuma kingunerisaanik aaqqissuussinerit taamaatiinnarneqarput isertitassaraluanillu annaasaqartoqarluni. Maannakkoqqissaaq Katuap aqutsisui siulersuisuilu 2020-imut tunngatillugu pilersaarutit qanoq isikkoqarnersoq misissorpaat. Katuap covid-19-ip kingorna kulturikkut aaqqissuussinerit pitsaasut pilersaarusiorlugit nangissavai.

• Siulersuisuni ineriartorneq pillugu aqutsisunik qanimut oqaloqateqarpugut aammalu periarfissat massakkut pisumit aninguinissatsinnut periarfissat misissortuaannarlutigit. Katuaq qanoq sivisutigisumik matoqqassanersoq nalunarpoq, taamaattumik ukiumi angusassamut qanoqqissaaq sunniuteqassanersoq naluarput, kisianni amigartooruteqarnissarput naatsorsuutigaarput. Pipaluk Kreutzmann Jørgensen oqarpoq.