2020 – Coronap malittaanik ukioq ilungersunartoq
Aningaasaateqarfik Katuaq 2019-imut sanilliullugu 2020-mi kaaviiaartitai (nettoomsætning) 10 mio. koruuninik annikilleriarput, ukiumullu naatsorsuutit naapertorlugit 2,3 mio. koruuninik amigartooruteqarluni. Amigartoorutit annertuut malunnaatillillu, taamaattorli atugassarititat eqqaallugit naammaginarlutik.
Coronap kinguneranik Katuap ilaatigut aningaasaqarniarnikkut ilungersunartumik eqqugaanera nipangiusimaneqarnikuunngilaq. Ukioq 2020 Katuap aningaasaqarniarnera siunissamilu qanoq ingerlanissaa pillugit, assut isumakuluuteqarfiuvoq. Pissutsit nalunartoqartaraluartut kiisalu atugassarititaasut innersuussutillu Katuamut killilersuinertaqaraluartut, aaqqissuussat iluatsittuarnikuupput.
Aaqqissuussinerilli, susassaqartitsinerit ataatsimeersuarnerillu annerpaamik 100nik peqataasoqartussaaneri aningaasaqarnikkut ilungersunartoqarput.
2020p ingerlanerani Katuap unammilligassai pillugit Namminersorlutik Oqartussat kiisalu Kommuneqarfik Sermersooq ataatsimeeqatigineqartarnikuupput, taamaammat ukioq 2020p aningaasaqarnikkut ilungersunartuusimanera tapiisartunit tupaallaatigineqanngilaq. Aningaasaateqarfik Katuaq ukiumoortumik ingerlatsinermut taperneqartarpoq, tamatumalu saniatigut kaaviiaartitat 70-75 procentii nammineq aaqqissuussisarnikkut pilersittarlugit, taamaammallu kaaviiaartitat annertuumik appariarnerat malunnaateqarpoq.
”Ukioq 2020 ilungersunarnikooqaaq, ukiorli manna (2021) angusaqarnerungaarnissarput neriuutigaarput. 2020 ilikkagaqarfiginikooqaarput, qanorlu kulturikkut pisuussutitta eriagineqarneqartariaqarnerat ilikkakkatta takusattalu takutippaat, kulturillu, aamma ajornartorsiulernerni, pingaaruteqarnertut nalilertariaqarnera ilikkarlutigu”.
Katuap siulersuisuini siulittaasoq, Anna Heilmann, ukiumoortumik ataatsimiinnermi ilaatigut taamatut oqarpoq.
2021mi Corona suli nalorninartoqartitsillunilu akornusersuiuassaaq, maannakkulli Katuaq piareersimanerulerpoq. Inuit qassit katerisimaarsinnaanerinut killilersuinerit qaammatip matuma ingerlanerani qasukkaallanneqarneri, ukiup sinnerani Katuap ingerlalluarsinnaanissaa neriunartoqalerpoq.
Aningaasaliisartut, aningaasaateqarfiit, aalajangersimasunullu tapiissuteqartartut suleqatigisallu tamaasa, aamma 2020mi tapiissutaannut Katuamiit qutsavigerusuppakka. Minnerunngitsumik siulersuisut sulisorisallu, tunniusimallutik paasinnilluarlutillu 2020mi Katuamik sullissilluarsimanerannut qamannga pisumik qutsavigaakka.
