Aningaasaateqarfiup inuussutissarsiorsinnaatitaasup Katuap siulersuisuisa Ivaaq Kriegel pisortatut atorfinitsippaat
Ivaaq Kriegel 36-inik ukioqarpoq IKT-mi (paasissutissiisarnermik, attaveqaqatigiittarnermik aamma teknologimik) Masteriulluni ilinniartitsisuullunilu, Aalborgip Universititiani ilinniarsimasaminik. Ilisimatusarfimmit ilinniartitisutut bacheloriuvoq, kiisalu assassornermut ilusilersuisarnermullu ilinniartitsisutut professionshøjskolemi ilinniagaqarsimasuulluni. Taakku saniasigut Nordisk Ministerrådip kulturimut eqqumiitsuliornermullu ataatsimiitsitaliaani aamma Nordisk Ministerådip meeqqanut inuusuttunut oqaatsinullu ataatsimiitaliaani ”Volt, kultur og sprog”-imut ilaasortaavoq. Manna tikillugu Ilisimatusarfimmi studieadjunkt-tut Ivaaq Kriegel atorfeqarpoq.
Eqqumiitsuliornermik kulturilerinermillu isumasioqatigiittarnerni marlunni kingullerni, Naalakkersuisunit aaqqissuunneqartartuni, Ivaaq Kriegel oqalugiartutut saqqummiusaqartarnikuuvoq, matumanissaaq kulturip tigussaanngitsup - immateriel kulturip - qanoq paasineqarsinnaanera sammisarsimallugu. Taamaasilluni nunatsinni, nunanilu avannarlerni eqqumiitsuliortunik kulturilerisunillu, Ivaaq Kriegel atituumik attaveqarpoq. Sulinngiffimmini piniarnermik aalisarnermillu ingerlataqartuuvoq, taamaattumillu aamma sulinngiffimminni piniartartut Nuummi peqatigiiffianni NTPAP-mi siulittaasuinut ilaasortaavoq. Kiisalu Ivaaq Kriegel kalaaliminernik nerisassiornermut aamma assiliisarnermik nuannarisaqarluinnartuuvoq, assilisanilu pissanganartut instagram-mikkut saqqummiussuisarluni.
Aningaasateqarfiup inuussutissarsiorsinnaatitaasup Katuap siulersuisuini siulittaasoq Juaaka Lyberth ima oqaaseqarpoq:
“Nuannaarutigilluinnarparput inuk ilinniakkamigut pikkorilluinnartoq aamma nalitsinni kalaallit kulturiannik sukumiilluinnartumik ilisimasaqartoq, teoriikkut misilittakkatigullu, minnerunngitsumillu naliginnaasumik aamma inuinnaat attaveqaqatigiittarfiisigut nukittooq, atorfinitsikkattigu. Ilisimatusarfimmi ilinniartitisarnermigut Ivaaq Kriegelip misilittagaqarfigilluinnarpaa inuit suleqatigiisillugit ataatsimoorussaminnik anguniaqaqatigiisinnissaat, anguniakkallu pivisunngortillugit. Ivaaq Kriegel aamma nunani avannarlerni tatigisatut toqqangaalluni ataatsimiititani marlunni ilaasortaaffeqarpoq, soorunalumi naggueqatitsinnik Canadami, Alaskami aamma Chokutka-mi suleqatigiinnerup pitsanngorsaavigineqarnissaa soqutigisarilluinnarlugu. Katuaq ukiut 25-it atuutereerluni, ukiunut nutaanut tullernut ikaarsaarluni aallartippoq. Taamaattumik siulersuisut – Katuami sulisut pisortallu peqatigalugit, aningaasaateqarfimmik pilersitsisut aningaasaliisartullu, ulluinnarni Katuamik atuisartut kulturilerisut, ataatsimeersuartitsisartut, aningaasaliisartullu suleqatillu, minnerunngitsumillu inuinnaat Katuamik atuisartut peqatigalugit – ukiunut tullernut periusissiaq iliuusissallu nutaat suliaralugit aallartippaat. Katuami siulersuisut isumaqarput suliassamut tassunga siuttunngortissallugu Ivaaq Kriegel piukkunnarluinnartuusoq, soorunalumi aamma Ivaaq Kriegelip akisussaaffigissavaa Katuap ulluinnarni ingerlanneqarnera, suleqatigilernissaalu qilanaaraarput”, Aningaasaateqarfiup Katuap siulittaasua Juaaka Lyberth oqarpoq.
Aningaasaateqarfimmi inuussutissarsiorsinnaatitaasumi Katuami pisortanngortussaq Ivaaq Kriegel ima oqaaseqarpoq:
“Nuannaarutigeqaara tulluusimaarutigalugu Katuami pisortatut atorfinittussanngorama. Eqqumiitsuliorneq kulturilu uanga assut nuannarisaraakka aamma Ilisimatusarfimmi studieadjunktitut atorfinni ilinniartitsissutigisarlugit. Neriuppunga – immaqaluunniit eqqornerusumik – isumaqarpunga suliamut aallartitassannut Katuap siulersuisuisa Nunattalu tamarmi uannut naatsorsuutigisaat naammassisinnaallugit. Katuami pisortaatut sulineq immikkut pisinnaatitaafferujussuuvoq. Nutaamik periussisiamik maanna aallartilikkatsinni takorloorpara, suleqatigiissutissamik Kommuneqarfik Sermersooq aamma Naalakkersuisut – Aningaasaateqarfimmik Katuamik pilersitsisut aamma tapiissuteqartartuusut pingaarnerit – nutaamik isumaqatigiissuteqarfigissallutigit, soorunalumi kommunit allat aamma. Katuaq nunatta tamarmi kulturip illorsuaraa, kommuninillu nutaamik isumaqatigiissusiornertigut Katuami aaqqissuussat amerlanerit illoqarfinnut nunaqarfinnullu allanut apuunneqarsinnaalissapput. Taamaasiornitsigut nunatsinni tamarmi eqqumiitsuliorneq kulturilu siuarsaaqataaffigineqarsinnaapputtaaq. Aamma attaveqaqatigeeriaatsit ullutsinnut naleqquttut atorluarnerusariaqarpavut, Cafetuarlu eqqarsaatigalugu ’nerisassat kulturilu’ ataqatigiissumik eqqarsaatigalugit ’pop-up restaurantitut’ ittunik aaqqissuussisoqartarsinnaanera ilanngullugu eqqarsaatigisariaqarparput. Taamaattumik atorfigiligassanni piffissaq pissanganarluinnartussaq ornipparput, atorfittaassannilu sulilernissara qilanaareqaara”, taama oqarpoq Ivaaq Kriegel.
Septemberip aallaqqaataani, 2023, Ivaaq Kriegel atorfittaassamini sulilissaaq.
Attavissat:
Siulersuisuni siulittaasoq Juaaka Lyberth: E-mail: siulersuisut@katuaq.gl , mobil nr. 499459/542981
Ivaaq Kriegel: E-mail: Ivaaq@katuaq.gl
