Josef Tarrak Turné
Katuap isiginnaagassiaq Josef Tarrak Kalaallit Nunaanni angalaartilerpaa oktoberip aappaaniit 18-at tungaanut. Septemberimi 2019-mi Katuami takutinneqaqqaarmat nuannarineqarluarpoq martsimilu angalasussaagaluarluni COVID-19 pissutaalluni taamaatiinnarneqarpoq. Isiginnaagassiap illoqarfiit arfineq marluk tikissavai.
Josef Tarrak - Nipilersukkat aallaavigalugit isiginnaagassiaq
Isiginnaagassiaq pilersitaavoq Pipaluk Kreutzmann Jørgensenimit Josef Tarrak-Petrussenimiillu Katuaq suleqatigalugu, ullutsinnilu Kalaallit Nunaanni eqqartugaasut sammineqarlutik.
’Josef Tarrak’-mi angutip inuusuttup marloqiusaasumik inuunera aallaavigineqarpoq. Josef inuunermini suut aqqusaartorsimavai – eqqumiitsuliortutullu ataatami atia Tarrak atorlugu isorinnippalaartumik ataataqannginnini apeqquserpaa.
Isiginnaagassiami Josef Tarrak-p saqqumersitaa nutaaq aallavigineqarpoq, inuunermini aqqusaakkat qulaaniillu ammut isigisoq kinaanersoq apeqquserneqarlutik. Ataataa? Guutiunerpa? Inuiaqatigiit? Kiamuna aqukkaa? Iluminniit anersaapiluup aquppaa imaluunniit suunuku nutsuaasut?
Oqaluttuaq sakkortooq attortinnartoq
Katuami aaqqissuusinernut pisortaq, Camilla Høg oqaluttuarpoq: ”Nuannaarutigeqaarput isiginnaagassiaq ’Josef Tarrak’ nunatsinni angalaartileratsigu. Ukioq kingulleq Katuami takutinneqaqqaarmat isiginnaarianut aalassatsitseqaaq. Isiginnaagassiaq attortinnartupilussuuvoq oqariartuutaalu sakkortulluni. Taamaattumik Katuap pingaartippaa sapinngisamik inuusuttunut tamanut takusissallugu. Isiginnaagassiami sammineqartut toqqaannartumik unneqqarissumillu oqaluttuarineqarmata inuusuttunut eqqortinartorujussuusinnaapput sakkortusinnaallutillu”.
Josef Tarrak-Petrussen Nanortalimmi ukioq 1998 inunngorpoq, tassanilu ukiuni siullerni anaanani aapparisaalu marokkomioq inooqatigalugit. Ataatsimik ukioqarluni angajoqqaavi avimmata Josef anaanani ilagalugu Danmarkimi nunatsinnilu nuuttaqattaartarsimapput. 2016-imi immiussisitsisartoq Aqqaluk Berthelsen rap-ertartorlu Peter Lyberth naapippai. Tamanna rappertartumut inuusuttumut inuunermut pissanganartumut nutaamullu aallartiffiuvoq.
”Josef Tarrak nipilersoriaatsimigut immikkuullarissumik nassaarsimavoq suleriaasaalu inersimarpalaaqaluni. Josef Tarrak-p taallai akisussaaffik kiap paarineraa nalilersuiffigisassanngortippaa. Nuna najugarisani apeqquserpaa, kisianni aamma avataanit isigisinnaallugu. Immiussisitsisut Peter Lyberth aamma Aqqalu Berthelsen suleqatigalugit kinaassutsini taallakkut takutippaa. Peqatigiillutimmi nunatsinni rap-ertarnerup silarsuaani nutaaliaasunik takutitsipput, maannalu isiginnaagassianngorlugit saqqummiunneqalerput.” – Pipaluk K. Jørgensen oqarpoq.
Isiginnaagassiap tikissavai:
2. oktober – Narsaq
4. oktober – Nanortalik
6. oktober – Qaqortoq
11. oktober – Maniitsoq
13. oktober – Aasiaat
15. oktober – Ilulissat
18. oktober – Sisimiut
Ilitsersuisoq: Pipaluk K. Jørgensen
Isiginnaartitsisut: Josef Tarrak-Petrussen, Ujarneq Fleischer aamma Maalia Mathiassen
SULEQATIT: Kommune Kujalleq, Qeqqata Kommunia, Kommune Qeqertalik, Avannaata Kommunia, Taseralik, Sermermiut, Nunatta Isiginnaartitsisarfia, UnoFilm
TAPIISUT: Permagreen, KJ Greenland
ANINGAASALIISUT: NunaFonden, Namminersorlutik Oqartussat Kulturimut aningaasaliissutaat, Tips- og Lottomidlerne
