KIMIK Katuami

Maajip arfineq aappaaniit Katuap iigaavi nutaanik eqqumiitsuliaqalissapput. Tassani eqqumiitsuliortut ataatsimoorfiata Kimiup saqqummersitsinera soqutiginnittunut tamanut ammarneqassaaq.

Covid-19 pissutaalluni sivisujaamik Kulturikkut Illorsuaq Katuaq matoqqareerluni pulaartunut ammaqqippoq. Taamaasilluni Katuaq nunatsinni eqqumiitsuliortut pikkorissut ilai arfineq marluk eqqumiitsuliaannik kusassarneqarsinnaanngorluni.

Pilersaarutaagaluarpoq saqqummersitsinissaq apriilimi ammarnissaa, kisianni covid-19 peqqutigalugu Katuaq sivisuumik matoqqasimavoq, arlaannaataluunniillu qaqugu ammaqqissanersoq ilisimasimanngilaa. Apriilip 25-iani Katuaq ammaqqissinnaalerpoq saqqummersitsinerlu piviusunngorsinnaalerluni.

  • Kiisami covid-19 peqqutigalugu matoqqareernerup kingorna Kimiup saqqummersitsinera ammarsinnaalerparput. Eqqumiitsuliortut piffissaq taanna utaqqisimavaat, eqqumiitsuliamik nutaat takutinnissaannut. Covid-19 peqqutigalugu eqqumiitsuliortut illoqarfinnit allaneersut Nuummukaassinnaasimanngilagut, kisianni qujanartumik eqqumiitsuliat anngupput. Sisamanngorpat pulaartut tikilluaqqunissaannut qilanaarpugut, tassani eqqumiitsuliortut amerlanersaat najuutissapput, Kimimmi siulittaasoq Kristine Spore Kreutzmann oqarpoq.

Saqqummersitsineq maajip arfineq aappaani nal. 16.30 ammarneqassaaq juunillu aallaaqqaataata tungaanut takuniarneqarsinnaalluni.

  • Kimiup saqqummersitsinerata piviusunngorsinnaanera nuannaarutigisorujussuuarput. Kimimmi eqqumiitsuliortut eqqumiitsuliatik tamatsinnit takuneqarsinnaanngorlugit saqqummersikkusukkamikkit qujavugut. Saqqummersitsineq aammaarluni assigiinngissitaartuuvoq aamma eqqumiitsuliat qanoq sananeqarnerat eqqarsaatigalugu, tamanna Katuap pulaartuisa qilanaarutigisinnaavaat, Katuap pisortaa Arnakkuluk Jo Kleist naggasiilluni oqarpoq.

Eqqumiitsuliortut peqataasut:
Naja Rosing-Asvid
Maria Panínguak’ Kjærulff
Ivínguak` Stork Høegh
Kristine Spore Kreutzmann
Elvar Örn Kjartansson
Lisa Kreutzmann
Paarma Brandt