Katuaq ukiuni 23-ni – Piitannguaq ukiuni 30-ni
Februarip 15-ani 2020 Katuaq kulturip illorsuata ukiut 23-nngortorsiornini nalliuttorsiutigissavaa. Ulloq taanna Hans Lynge-p Inersuaani Piitannguaq Alaufesen quiasaarummik isiginnaartitsissaaq, inuttat nalunnginneqarluartut atorlugit. Ukioq 2020-mi Piitannguaq Alaufesen ukiuni 30-ni isiginnaartitsisartutut nalliuttorsiussaaq.
”Katuaq nunatsinni immikkuullarissumik inissisimavoq, kulturip illoqarfiillu pingaarnersaata qeqqarpiaani. Ukiuni 23-ni Katuami misigisat nuannersorpassuit aqqusaarsimavagut ulluinnarnilu inunnut tamanut naapiffiusarluni. Katuami upperaarput kulturip inunnut nukittorsaasoq inuillu kulturimut nukittorsaasut. Tamanna sulinitsinnut ataqatigiinitsinnullu tunngavittut isigaarput”, Katuami pisortaq Arnakkuluk Jo Kleist oqarpoq.
Piitannguaq ukiullu 30-vat – ”Qiimmassartarlutalu!”
Tusaamasarsuaq nuannarineqarluartorlu. Inuttalersuisarpoq immikkuullarissunik nuannarillualernikuusatsinnik. Piitannguaq Alaufesen qularnanngilaq nunatsinni quiasaarisartuni nalunnginneqarnerpaat ilaanniittoq ukiunilu 30-ni nuannarineqarluarluni illarsaarisarsimasoq. Puigunaatsunngorpoq Mikialai Utizai Kutsun-mi inuttalersuinermini. Kingornalu nunatsinni illoqarfiit nunaqarfiillu tamangajaasa tikittarlugit angalarsarsimavoq. Maannalu kisimiilluni quianartumik isiginnaagassiorpoq ukiut 30-t scene-miittarnini nalliuttorsiutiginiarlugu.
Nunatsinni nunarsuarmilu inuiaqatigiinni pissutsit aallaavigalugit, isiginnaagassiami ilaatigut quiasaarutigineqarput inuttat assigiinngitsut sisamat, taakkulu tamarmik inuttut ataasiakkaatut inuunermi suut naapittarsimaneraat, qanorlu inuunerminnik atuinersut takutitinneqassallutik.
Uani quiasaarinermi oqaatsit periutsillu atorneqartut illarnartuliaammata naakkut sanneqqalernissaq ilimagineqarsinnaavoq.
Piitannguaq Alaufesen-ip isiginnaatitsinissaanut isissutissat katuaq.gl-mi imaluunniit Katuap saaffiginnittarfiani pisiassaapput.
