Katuaq ukiuni 25-ni
Katuaq kulturikkut assigiinngisitaaqisunik misigisassaqartitsillunilu ineriartortitsisimalluni ukiuni ukioq manna 25-nngortorsiussaaq. Kalaallit Nunaanniittugut tamatta pilluarta, immikkullu kulturilerisut pilluaritsi.
Nunatta Kulturikkut Illorsua – Katuaq februaarip 15-iani 1997-imi ammarpoq. Kulturip illuanik ammaaneq tamanut isumaqarsimaqaaq aamma sorpassuit kikkorpassuillu Katuaq kingorna katersuuffigiuarpaat. Illu nalliuttorsiutigiinnassanngilarput, aammali kulturikkut inuunerup ineriartorsimanera ineriartortuarneralu tulluusimaarutigisinnaajumaarparput.
- Katuap pilersinneqarnissaanut suleqataasut piviusunngormallu ineriartortitseqataasimasut tamaasa Katuaminngaanniit eqqarsaatigalugillu qutsavigerusuppavut. Katuami sulisimasut Katuamillu suleqateqarsimasut tamassi qujanaq, Katuap kulturimik suliaqarnerani tapiisarsimasut tamassi aamma qujanaq, siulersuisut siulittaasuat Anna Heilmann oqarpoq.
Nalliuttorsiorneq ukioq naallugu annerusumik minnerusumilluunniit malunnartinniarneqassaaq. Soorlu ilaasa malugereersimassagaat, ukiup matuma uatsinnut nalliuttorsiorfiunera ersersinniartuarparput, soorlu Nunatta Isiginnaartitsisarfia suleqatigalugu aaqqissuussaqarnerput nalunaarutigigipput, aamma immikkut ittumik suliniutit ukiup ingerlanerani pisussat nalunaarutaasarumaarput. Nalliuttorsiornermut atatillugu suliniutit Katuap nittartagaatigut inuillu internettikkut attaveqaataasigut takuneqarsinnaasassapput.
Katuap nalliuttorsiornera ataatsimoorluta katersuuffigisinnaanngikkallarparput - covid-19-ip tunillaassuunnerata kingunerisaanik – pisussalli ukiormanna kingusinnerusumut kinguartinneqarput.
- Ullorli atoqqaarfissiorneqarfipput, februaarip 15-iat, nalliussineqassaaq malunnartinneqarlunilu. KNR suleqatigalugu Katuamiit toqqaannartumik TV-kkut unnukkut aallakaatitsisoqassaaq. Katuap ukiuni 25-ni siullerni atuunnera kingumut qivialaassavarput. Qilanaarnaqaaq, pisortaq Arnakkuluk Jo Kleist oqarpoq.
