Kulturilerinermik aaqqissuisartut nunarput pillugu suleqatigiipput

Kulturilerinermik aaqqissuisartut nunatsinni tamaneersut sap.ak. kingulleq katerisimaarput, Kalaallit Nunaanni kulturikkut unammilligassat akimorlugit suleqatigiinnerulernissaq oqaluuseralugu. Covid-19 kulturilerisunut annertuumik sunniuteqarpoq, taamaammallu kulturip nutaamik suleqatigiissutiginissaata oqallisiginissaa pingaaruteqarpoq.

- Eriagisagut kulturerpullu ingerlaavartumik uummarsaqqinneqartuassapput, qanorluunniit inuiaqatigiit unammilligassaqartigingaluarpata. Taamaammat nunap iluani nunanilu allani suleqatigiinneq pitsanngorsartariaqarpoq, Samuel Simonsen Kommune Kujallermiit oqarpoq.

Kulturi takussaanerulersittariaqarpoq
Pingajussaanik taamatut isumasioqatigiittoqarpoq, ukiumullu ataasiarlutik naapittarnissartik siunnerfigaat.

- Kulturip silarsuaani sulineq saqqummilaartinniarlugu eqimattanik immikkut tamarmik suliaqartussanik pilersitsiortorpugut, siunertallu ilagaat nuna tamakkerlugu kulturi pillugu nalunaarusiornissaq, Ilulissani kultuikkut illorsuarmi Sermermiuneersoq, Katrine Noahsen Gundel, taamatut oqarpoq.

Katuami pisortaq Arnakkuluk Jo Kleist isumaqataalluni ilaliivoq:

- Katerisimaarneq nutaanik nukissanitsitsiuaannarpoq, kulturikkut aaqqissuussisoqartillugu uagut nammineq aaqqissuussisutut inissisimasaratta, tamannali nunarujussuatsinni sumiiffinni assigiingitsuni pisarluni. Kulturip inuiaqatigiinni qanoq pingaaruteqartiginera ataatsimoorlutalu kulturilerinermik patajaallisarnissatta qanoq pingaaruteqartiginera, isumasioqatigiinnermi kingumut takuneqarpoq.

Isumasioqatigiinnermik Katuaq aaqqissuisuuvoq, Sermermiuni atorfillit peqatigalugit, aappaagulu kujataani naapinnissaq pilersaarutaavoq. Isumasioqatigiinnermi Kultureqarnermut Naalakkersuisoqarfik, septembarimi Nuummi kulturi pillugu isumasioqatigiissitsisussaq, peqataatitaqarpoq.

Isumasioqatigiinnermi peqataapput ukunani kulturilerisartut, Uummannaq, Ilulissat, Sisimiut, Maniitsoq, Nuuk Narsaq kiisalu Nanortalik.

Ataatsimut assilisinnermi assimiittut, saamerlerniit: Arnaaraq Lange (Avannaata Kommunia), Regine Mathiassen (Qeqqata Kommunia), Susanne Andreasen (NUIS), Katrine Noahsen Gundel (Kulturhuset Sermermiut), Nikku Brandt (Kommune Kujalleq), Bella Broberg (Kommune Qeqertalik), Bula Larsen (NAPA), Fali Kleist (Qeqqata Kommunia), Uiloq Mathæussen (Naalakkersuisut), Kristian Bjerg (Kulturhuset Sermermiut), Rigmor Villadsen (Avannaata Kommunia), Samuel Simonsen (Kommune Kujalleq), Chloe Christensen (Nunatta Atuagaateqarfia), Jonna Qvist (Avannaata Kommunia), Arnakkuluk Jo Kleist (Kulturhuset Katuaq) kiisalu Per Bloch (NAPA).