Meeqqanut isiginnaagassiaq

Katuap meeqqat ulluat malunnartinniarpaa isiginnaagassiaq nutaaq Ujarneq Fleischer-mit isumassarsiarineqartoq takutillugu. Ujarneq-p isiginnaagassiami aqutsisoq Naleraq Eugenius Japanimi angalaqatigalugu isumassarsiorlutik tigulaarinnillutik isiginnaagassiaq ilusilersorpaat. Aprilimili inuusat suliaralugit isiginnaagassiarlu ilusilersorlugu aallartipput.

Aaqqissuussanut pisortaq Camilla Høg oqarpoq: ”Katuami takorluukkatsinnut oqariartuut malillugu ukiut pingajussaat meeqqat ulluani tunissuteqarpugut meeqqanut tulluartumik: Piorsarsimassuseq nukittortitsisoq inuiaqatigiinnut, meeqqammi kulturimik atuisuni pingaarnerpaat ilaanniikkamik siunissamilu kulturimi pilersitsisuusussaammata.

Isiginnaagassiaq Ningyo Japanimi pillugu
Ukki Japanimut tikeqqammerluni kammalaatini Ningyo ilagalugu, Ningyop toornaa Ketsune ujalerpaat. Aqqutaani uumasunik, Japanimiunik naapitaqarput paasillugulu Ketsune arnaqquassaap tigusarisimagaa. Taamaallutik Ukki Ningyolu Ketsune annaanniarlugu paasiniaallutik angalapput.

”Qilanaareqaarput una isiginnaagassiaq meeqqanut ilaqutariinnullu takutissallugu. Qangali inuusat atorlugit isiginnaagassiamik sanarusussimavunga massakkullu piviusunngulerpoq.” Isiginnaagassiami pilersitsisoq isiginnaartitsisorlu, Ujarneq Fleischer oqarpoq.

Isiginnaagassiaq meeqqanut tallimanik ukioqalereersunut naleqquppoq kalaallillu oqaasii atorneqarlutik.

Isissutissat 20 kr.-mik akeqassapput Katuamilu saaffiginnittarfimmi imaluunniit www.katuaq.gl -mi pisiassaassallutik.

Ujarneq Fleischer – Isiginnaartitsisartoq, Inuusaliortoq, pilersitsisoq
Nukakkuluk Kreutzmann – Isiginnaartitsisartoq
Qillannguaq Berthelsen – Nipilersuusiortoq
Naleraq Eugenius – Isiginnaagassiami tekniker, tunuliaqutiliortoq, pilersitseqataasoq