Qitittartut nunatsinni festivaleqartarnerat alliartorpoq

Katuap qitinnermik festivaleqartitsisarnera Outervision aatsaat taama takutitassaqartigaluni ukioq manna ammassaaq. Festivali sinerissami illoqarfinnut arlalinnut anngutissaaq, takutitsinernik arlaqartunik sungiusarfinnillu neqerooruteqassalluni.

Outervision arfinilissaa una qaammat ingerlanneqassaaq. Ukioq manna festivali suli amerlanerusunik neqeroorutissaqarpoq. Nunanit avannarlerneersut suleqatigiillutik immikkut takutitassiaata saniatigut tikeraat arlallit nunanit avannarlerneersut takutitsissapput. Ukioq manna filmertarfimmi qitittunik aamma isiginnaagassaqassaaq. 

Outervisionit siuliinisut sungiusarfinnik tamanut ammasunik akeqanngitsunillu peqassaaq, qitittartunit nunatsinneersunit tikeraanillu ingerlanneqartussanik.

Sinerissamut angalaarneq
Outervision sinerissami illoqarfinnut/nunaqarfinnut tallimanut tikissaaq, taakkunanilu qitittartut arfinillit takutitsisarlutillu akeqanngitsumik sungiusaasassapput.

Outervision Nuummi Katuami aallartissaaq oktobarip 8-aniit 14-ianut. Sap.ak. taassuma ingerlanerani meeqqanit arfinilinnik ukiulinnit inersimasunut qitinnermik misileerusuttunut sungiusarfeqassaaq. Sap.ak. ingerlanerani aamma takutitsinerit filmertitsineruíllu assigiinngitsut isiginnaarneqarsinnaapput.

  • Nuuk: Oktobarip 8-niit 14-ianut.
  • Maniitsoq: Oktobarip 16-aniit 20-anut.
  • Kangaamiut: Oktobarip 20-aniit 23-anut.
  • Kulusuk: Oktobarip 24-aniit 27-anut.
  • Tasiilaq: Oktobarip 27-aniit 31-anut. 

Takutitsinerit sap.ak. tulliani aallartissapput
Inuussutissarsiutigalugu qitittartut arfinillit nunanit avannarlerneersut Nuummut tikereerput Outervisionimi takutitassamik suliaqartussaagamik. Aatsaavik naapissapput, ataasiakkaarlutillu piginnaanititik aallaavigalugit takutitassartik suleqatigiillutik suliarissavaat.

Paasissutissat takutitsinernut allanullu tunngasut Outervisionip Facebookimi quppernerani Katuallu nittartagaani nassaarineqarsinnaapput.

Katuap qitinnermik festivalia ukunannga taperneqarpoq: Tips- og Lottomidlerne, SermeqFonden, NunaFonden, NAPA, Namm. Oqartussat kulturimut aningaasaliissutaannit kiisalu den Grønlandske Fond.