Qooqqut Festival Coronap nalaani

Ullut 14 aamma 15 august Katuap aaqqissugaanik ilaqutariinnut Festival Qooqquni ingerlanneqassaaq. Sapaatip akunnerata naanera ataatsimooqatigiinnermik, sammisaqaqatigiinnermik aliikkusersuinermillu imaqartussaasoq Corona peqqutaalluni qanillivallaarnaveersaarluta ingerlatissavarput.

”Qilanaaqaagut massakkullu festivali piareersarlugu ulapputigaarput sumiiffitsinni aliikkusersuisartut nipilersortartullu pikkorissut suleqatigalugit aaqqissuussaq pilersaarusiorparput.
Pisortat maleqqusaat tamaasa malillugit aaqqissuussivugut, maleqqusanut malinnaavugut pisoqarneranilu aamma peqqussutit malitassaasut aallaavigalugit aaqqissuussaq piareersarparput.
Tamaammakkaluartoq aaqqissuussaq, ikinnerusunik ornineqassagaluartoq, tikerartullu ikinnerussagaluartut nuannerunarteqaarput” Katuami aaqqissuusinermi pisortaq Camilla Høg oqarpoq.

Sammisassat alikkusersuinerillu
Katuaq festivalimik aaqqissuussivoq Qooqqut Nuan suleqatigalugu, festivali ammassaaq tallimanngorneq 14 august unnukkut nipilersortoqarluni, aqaguanilu arfinngorneq 15 august pikkorissaanerit allallu aliikkusersuinerit ullukkut pissallutik unnukkull nipilersornerit ingerlanneqassallutik.

Festivaalimi uku misigisassaapput:
Small Times Giants, Îsâvaraq Petrussen ernerilu, Laura Aviana, Gerth Lyberth, Nikolaj Lønstrup, Zika, Qooqqut Band, Kusernerit, Takuss Dou, Kuka Fleischer aammalu scene ammasoq.

Sammisassaq assigiinngitsut ilaqutariinnut tamanut: sanalunneq, qilaatersorneq, eqqarsaqqissaarneq(meditation) yogalu, Meeqqat eqqumiitsuliorneraq, Inuit & Dene Games, itsarnisarsiorneq(Arkæologi), oqaluttualerineq, nammineq tajaliorneq, mobil atorlugu filmeeraliorneq, ikumaartitap eqqaani iffiorneq, erinarsorneq, taavalu unnukkut taarsiarsaalerpat ersinartumik Kalaallit filmiliaannik filmerneq pinngortitami kusarnerpaami.

Pinngortitami festivaali:
Aaqqissuussaq peqataaffiginiarukku nammineq Qooqquliarnissat isumagissavat Katuallu sammisassaqarneq aliikkutassallu isumagissavai. Unnuiniaruit tupeq tuperfissami napparsinnaavat angallammiluunniit sinillutit.

Qooqqut Nuan neriniartarfik ammassaaq illinnartunillu nerisinnaavutit.

Kikkulluunniit peqataasinnaapput peqataanerlu akeqarani, pisortalli katersunnermut maleqqusaat malittussaagatsigit peqataasussat killeqarput. Ukioq manna peqataaniartut Festivalimut isissutissamik peqaqqaassapput taakkulu Katuamut aaneqarsinnaalissapput akeqanngitsumik  4 augustimiik.

Tunngavik:

  • Qooqqut Festival ukiut tallimassaa aaqqissuunneqarpoq.
  • Festivaali imigassartaqanngilaq sammisassallu ilaqutariinnut tulluartut sammineqarsinnaallutik.
  • Aaqqissuussamut peqataaneq akeqanngilaq.
  • 4 augustimiik festivaalimut isissutissat akeqanngitsumik aaneqarsinnaalissapput Katuamut.
  • Festivaalip piviusunngornissaanut aningaasaliisuupput: Kommuneqarfik Sermersooq, Sermeq Puljen, Nordisk kulturfond, NAPA, Grønlandsbanken, Tele-Post, Brugseni, Bank Nordik, PErmagreen, KK Engros, Stark, Nuuk imerlu.