Qooqqut Festival iluatsilluavippoq
Ukioq manna Qooqqut Festivaleqarneq inunnit 1.000-it missaanniittunit orninneqarsimavoq. Seqinnarissuup nalaani ingerlanneqarpoq, inuillu inussiarnersorpassuit naapitassaasimallutik.
Festivaleqarneq iluatsilluavippoq. Pitsaanerusinnaasimanngilaq, silagissioqaagut, aliikuusersuisut aliikkusersuilluaqaat inuillu qiimasorpassuit festivaleqataapput, taama oqarpoq pisortaq Arnakkuluk Jo Kleist.
Qooqqut Festival 11.-12. august Nuup Kangerluani Qooqquni ingerlanneqarpoq.
Qooqqut Festival ilaqutariinnut imigassartaqanngitsumik festivaleqarnertut Katuamit 2015-imili aaqqissuunneqartarpoq, sulilu ulloq manna tikillugu ingerlalluni. Festivalip nalaani nipilersorneq workshopeqartitsinerlu ingerlanneqartarput. Tamakku saniatigut ikumatitsilluni erinarsoqatigiinnerit, oqaluttuaqattaannerit filmertitsinerillu ingerlanneqartarput.
Katuami sulisut aamma kajumissutsiminnik ikiuuttartut festivalimik ingerlatsisuusarput. Festivali sioqqullugu ataasinngornikkut ingerlatsisussat ilaat siuarlutik Qooqquliarsimapput.
Peqataasut ikiuuttullu tamaasa qamanngavik qutsavigerujussuarusuppagut. Ingammik Qooqqut Nuan-imik aallussisut immikkut qutsavigiumavagut suleqatigiilluarnitsinnut ukiullu ingerlanerini peqataajuarsimanerannut, Arnakkuluk Jo Kleist naggasiivoq.
Suleqatit aningaasaliisullu:
- Qooqqut Nuan
- Nuuk Watertaxi
- Tips- og lottomidlerne
- Selvstyret
- NunaFonden
- Nuuk Lokaludvalg
- NAPA
- GrønlandsBanken
- Godthåb transportservice
- KK Engros
- Nuuk Imeq
