Ukiut 25-t – Uummammit pisumik qujanaq
Ulloq februaarip ulluisa 15-iat persuarsiornaqaaq. Katuap 25-liiffia. Sulisut nuannaartut pikkorissullu peqatigalugit ulloq ullaakkorsioqatigiinnermik aallartipparput, ullorlu naallugu Katuaq nalliuttorsiutigalutigu.
Katuap ukiuni 25-ni atuunnerani aaqqissuussinerit pissanganartut amerlaqisullu pisarsimapput, ukiullu ingerlanerini pisartut amerlasimaqalutik. Pisarsimasunut atatillugu kikkulluunniit Katuap atuunneraniit maannamut arlaatigut suleqatigisimasagut tamaasa siulersuisut siulittaasuattut matumuuna qutsavigissallugit inissaminiippoq. Uku qutsavigerusuppakka:
- Katuap pilersinniarneqarnissaanik isumassarsisut ammarnissaanullu ikiuuttut.
- Katuami ukiut ingerlanerini pisortaasimasut maannalu pisortaasoq.
- Sulisutsialaat tunniusimallutik ukiut ingerlanerini sulisuusimasut maannalu sulisuusut.
- Katuami siulersuisuusimasut siulersuisunilu ukiut ingerlanerini ilaasortaasarsimasut.
- Aningaasaliisartut, ukiut ingerlanerini tapiisarsimasut ullumikkullu tapiisartut.
- Kulturimut atatillugu ukiut ingerlanerini maannalu suleqatigisartakkagut – Kalaallit Nunatsinni nunarsuullu sinnerani.
- Kulturilerisunut, nipilersortartunut, eqqumiitsuliortunut, filmiliortartunut Nunatsinniittunullu allanut tamanut oqarusuppunga: Qujanarujussuaq.
- Naggataatigut, kulturimut atatillugu, cafémi naapinnissamut atatillugu il.il. Katuamik atuisartunut qujanaq.
Uummammit pisumik qujanaq aamma pilluaritsi tamassi.
Katuap siulersuisuinit suleqatigilluaqqinnissatsinnut qilanaarpugut.
Ajunnginnerpaamik inuulluaqqusillunga
Anna Heilmann
