Katuaq ukiaru nutaamik pisortartaassaaq

Kulturip Illorsua Katuaq ukiaru nutaamik pisortartaassaaq. Ukiuni tallimani pisortaareerluni, suliassat allamut ingerlateqqikkusullugit, Arnakkuluk Jo Kleist atorfimminit soraarniuteqarpoq.

  • ”Katuami siulersuisuni siulittaasutut ajuusaarutigalugu tiguara Katuap maannamut pisortaata Arnakkuluk Jo Kleist-ip soraarniuteqarnerminik nalunaarutaa. Ukiuni tallimani kingullerni Arnakkuluup Kulturip Illorsuani Katuami pisortatut atuunnerani kulturikkut annertuumik nunatsinni ineriartortoqarsimavoq. Aammali covid 19-ip nalaammatigut piffissaq Katuamut imaannaanngissimaqaaq, Katuammi ’inuussutigaa inuit amerlasuut katersorlugit nuannersunik misigisaqartinnissaat, taamaasiorsinnaanngeriataalernerlu assut Katuamut ilungersunartorsiortitsisimavoq. Arnakkululli pisortaralutigu, pikkorissorpassuarnillu sulisoqarluta, aningaasatigut coronap ajornartorsiutitsileraluarnera qaangersinnaasimavarput. Siulersuisut tamaasa sinnerlugit Arnakkuluk Jo Kleist qujaffiginiarpara ukiuni tallimani Katuamik sullissilluarsimaneranut, siunissamullu pitsaasunik kissaallugu”, Katuami siulersuisut siulittaasuat Juaaka Lyberth oqaaseqarpoq.

Arnakkuluk Jo Kleist Katuami pisortaalerpoq 2018-imi juunip aallaaqqaataani, taannalu sioqqullugu Tele-Post-imi attaveqaqatigiinnernut pisortaasimalluni, sioqqullugulu AWG2016-mi sulianut pisortamut tullersortaasimalluni.

 

  • Katuami ukiut tallimat pitsaasuullutillu pissanganarsimaqaat, pingaarutilinnik suleqatigiiffiullutik, annertuunik nutarteneqarluni, illorsuup iluani aamma kulturikkut aaqqissuussanik suliarpaqarfiulluni. Ukiulli taakku aamma unammillernartuullutillu ilinniarfiusimaqaat, kulturikkut ingerlatsisorpassuit sukkaqisumik ineriartorfiusimammata. Aalajangerpunga uannut piffissanngortoq aqqutissannik nutaanik ujartuinissannut, ukiarulu aquutip allamut tunniunnissaanut piffissaq eqqornerpaasoraara. Piffissap taassuma tungaanut Katuami pisortatut aamma kulturilerisunut sullissinermut sulinera soorunami ingerlatiinnassavara”, Arnakkuluk Jo Kleist oqarpoq.

 

  • Katuami pisortatut sulinera qujamasullunga eqqaasarumaarpara, sulisut pikkorissut, kulturip illorsuanik Katuamik suliffeqarnerminnik tulluusimaarutiginnittut suleqatigisimanerinut. Inuiaqatigiinnimi aaqqissuussinernut pingaarutilinnut angisoorsuarnullu sulisut tunniusimalluinnarneri pingaaruteqarluinnartuusarpoq”, Arnakkuluk Jo Kleist naggasiivoq.

Nutaamik pisortassarsiornissaq piaartumik aallartittussaq Katuami siulersuisut aquttuuffigissavaat.