Kulturikkut aaqqissuisartut peqatigiillutik ineriartortitsiniarput
Nunatsinni kulturikkut aaqqissuisartut sap. ak. kingulleq Taseralimmi, Sisimiuni kulturikkut illorsuarmi, isumasioqatigiipput ataatsimoorussanik siunniassanik pilersaarutinillu inerneqartumik.
Isumasioqatigiinneq ullunik marlunnik ingerlanneqarpoq kommuninit assigiinngitsuni sulisuniit, kulturikkut illorsuarniit, nunatta isiginnaartitsisarfianiit nunattalu atuagaateqarfianiit peqataaffigineqarluni.
Isumasioqatigiinnerup kingorna Katuami pisortaq Arnakkuluk Jo Kleist imatut oqariartuuteqarpoq:
- Isumasioqatigiinneq ingerlalluaqaaq nunatsinnilu sumiiffinni assigiinngitsuni taamatut akisussaaffillik qanimut naapillugit nuanneqaaraasiit. Oqarsinnaavunga ataatsimoorluta nunatsinni kulturilerinerup silarsuaani ineriartortitserusoqisugut atugassarititaasullu ineriartortinnissaanut suleqataarusulluta. Siunniussagut aqagu anguneqarnavianngillat kisianni akornitsinni attaveqaqatigiinnerput ataavartumik ingerlalluarutsigu nalunngilarput pitsaasumik sunniuteqaqataasinnaassalluta.
Isumasioqatigiinnermi 2020-imut pilersaarutit isumassarsiallu ilaatigut sammineqarput, kiisalu kulturilerup silarsuaani ilisimasanik paasissutissanillu misissuinissaq, kulturi pillugu paasissutissanik nittarsaassineq inuiqatigiinnilu siumut eqqarsarluni kulturikkut siunniussassaqarnissat pingaaruteqarnera aamma eqqartorneqarlutik.
2018-imi isumasioqatigiinneq Katuami (Nuuk) ingerlanneqarpoq, ukiormanna Taseralimmi (Sisimiut) pilersaarutaavorlu aappaagu 2020-imi Sermermiuni (Ilulissat) ingerlanneqarnissaa.
Tulliani ataatsimooqqinnissaq pitinnagu attaveqaatit internetti aqqutigalugu atorneqarsinnaasut atorlugit ataatsimiinnerit ingerlanneqartarumaarput.
Katuap isumagsioqatigiinnerit aaqqissuuttarpai Taseralimmi sulisut suleqatigalugit.
Attavissaq: Katuami pisortaq, Arnakkuluk Jo Kleist, ceo@katuaq.gl, 547854.
