Kulturikkut aaqqissuisartut kultur pillugu ataatsimoortut
Kalaallit Nunaanni kulturikkut ataqatigiissaarisartut attaveqatigiinniarneq pillugu paasiniaaqatigiinneq Katuami novemberip 20-ani 21-anilu ingerlanneqarpoq.
Attaveqatigiinniarnerup paasiniaaqatigiinnerullu siunertarivaa kulturikkut aaqqissuisartut nunami tamaneersut suleqatigiinnerat nukittorsarneqarnissaa, nuna tamakkerlugu kulturikkut aaqqissuussanut iluaqutaasussamik.
Siullermeersumik ukioq manna aprilimi katerisimaartoqarpoq, assigiinngitsutigut kulturikkut suliallit qaaqquneqarsimallutik. Maannali kommuneni kulturikkut aaqqissuisartut, kulturit illorsuaneersut, nunattalu kulturikkut suliffeqarfianeersut qaaqquneqarsimapput.
Paasiniaaqatigiinneq iluatsilluarpoq. Nuannersumik ingerlanneqarpoq, peqataasullu kulturikkut aaqqissuussat pingaartinneqarnerulernissaat piumasaqaatigaat.
Kulturikkut aaqqissuussisartuni suleqatigiinneq nukittorsarnissaa, kulturi inuussutissatut piorsarneqarnissaa, kulturikkullu aaqqissuunneqartartut pingaassusaat saqqumminerulernissaat paasiniaaqatigiinnermi eqqartorneqarput.
Kalaallit Nunaanni kulturikkut aaqqissuunneqartartut akusiorneqarnissaat atorfissaqartinneqarnera isumaqatigiissutigineqarpoq. Suna sumilu pisarpa, aningaasat kulturikkut aaqqissuussanut atorneqartartut suminngaanneerneri ersersarneqartariaqarmat. Ersarinnerulerpatami kulturisiornikkut pisartut siumoornerusumik ajunnginnerusumillu pilersaarneqarsinaalissagamik.
Paasiniaaqatigiit tusarliuutigaat kulturikkut aaqqissuunneqartartut inuussutissarsiutaallutillu inuiaqatigiinnut pingaaruteqartuusut. Tamaammat kulturi aliikkutassaannaanngilaq, missingersuutininngaanniillu piiginnagassaanngitsut. Nunaqarfinni illoqarfinnilu tamani kulturikkut aaqqissuussat pimoorunneqarnerusariaqarput, siuariarnissarlu pillugu ikioqatigiissaagut.
Tamaammat paasiniaaqatigiinnerit aappaagu ingerlateqqinneqassapput. Siullertut pilersaarutaavoq paasiniaaqatigiinnerit 2019-imi 2020-imilu ingerlatiinnarneqassasut.
Paasisaqarneruniaruit Katuap pisortaa Arnakkuluk Jo Kleist saaffigiuk, tlf. 547854
