PanArcticVision aliikkusersuisartunik ujaasivoq!

PanArcticVision Norge-p avannaani Vadsø-mi scenemiit, 2023 aggustip 9-anni siullerpaamik toqqaannartumik Issittumi tusarnaartartunut naliliisussanullu tamanut aallakaatitsissaaq

Erinarsuutit peqataasussallu siunnersuutigineqarneqarnissaat tikilluaqquarput:

1. Nipilersugaq tassaasinnaavoq erinarsuut, erinaq, rap, niperujoorut, nipilersugassiaq… - arlaatigut nipilersorfimmi toqqaannartumik illit nammineq (allanilluunniit peqateqarlutit) aliikkusersuutigisinnaasat. Minutsit sisamat missaanni sivisussuseqassaaq.
2. Una taaneqaraluartoq PanArcticVision, Europa-mi unammisitsinerni erinarsuutigineqakkajuttunut assigusut UJARTUNNGILAGUT: The PanArcticVision tassaavoq, Issittumi sumiiffini assigiinngitsuni kulturikkut assigiissutitsinnik assigiinngissutitsinnillu saqqummiussisarfissaq. Sumiiffinni oqaatsit atorlugit erinarsortoqarnissaa, nipilersoriaatsillu assigiinngitsut akoorullugit saqqummiisoqarnissaa tikilluaqquarput. Sumiiffinni avannaarsuanilu pissutsit pillugit taalliat saqqummiuteqqunarput, politikkimullu tunngasut ilanngussorneqarsinnaallutik. Aliikkusersuisartutut piginnaaneqarluartut ujarpagut, qanorli aliikkusersuinissaq, qassinik ukioqarneq, qanoq ittuuneq qanorluunniit nunarsuatsinnik isiginneriaaseqarnerit apeqqutaanngillat – soorunalumi eqqumiiginarsinnaasut tikilluaqquneqarutik. Tupaallatsitsigut!
3. Peqataasussat ungasissumut angalasussaammata, Issittumilu angalaniarneq akisoqimmat, peqataasussat amerlassusaat killilersimaartariaqarparput. Kisimiillutit aliikkusersuissaguit ajornaquteqanngilaq. Inuit aamma marluusinnaassapput. Amerlanerugussili; oqaloqatigiitta! (Imaassinnaavoq Vadsø-mi najugalimmik ikiorteqarsinnaasutit imaluunniit soorlu angalaqatigiissinnaaneq iluaqutissiissutigisinnaallugu).
4. Nipilersukkat/erinarsuusiat saqqummiunniakkat immiunneqassapput (imaluunniit erinniarereernikuusat aallaavigalugu eqqarsaasersuutit nassuiarneqassallutik). Assit arlaqanngitsut, tunuliaqutaq pillugu paasissutissat pisariaqartippagut kiisalu sooq aaqqissuussamut matumunnga peqataarusunnersutit paaserusullutigu.
5. Saqqummiussassatut siunnersuutit naliliisartunit kiisalu PanArcticVision-imi producer-init nalilersorneqassapput (naliliisartut namminneq aliikkusersuisartoq saaffigisinnaavaat, qinnuteqartut ilaat arlallilluunniit isumasiorneqarsinnaapput imaluunniit aliikkusersuisussatut qaaqqusaqarsinnaallutik).

Peqataasussatut toqqagaaguit qanoq pisoqassava:

1. Vadsø-mukassaatit (Avannarpasissuseq 69 grader, Finnmark, Norge) tassani ulloq aggustip 9, 2023, Varangerfestivalen-imut atatillugu isiginnaartoqarlutit nipilersukkamik saqqummiissaatit. Aaqqissuussaaq Issittoq tamakkerlugu streamerneqarluni toqqaannartumik aallakaatinneqassaaq.
2. Allat peqatigalugit nipilersukkamik saqqummiineq (tamanna qanoq pisinnaanersoq pillugu isumasioqatigiittariaqarpugut…)
3. Videokkut ilisarititsissutissamut peqataassaatit, najugaqarfiit/inuiaqatigiit/avatangiiseq takutillugit. Sumiffimmi videoliortartut videoliortuussapput.
4. Vadsø-mi pisussap missaani ullut marlussuit aallakaatitassiani inuit naapiffissaanni peqataasassaatit. Kingusinnerpaamik aggustip 5-anni aallarnissat kiisalu siusinnerpaamik aggustip 10-anni uternissat naatsorsuutigissavat.
5. Angalaneq, unnuiffissat nerisassallu aaqqissuisunit isumagineqassapput (annerpaamik inunnut marlunnut). Aliikkusersueqatigiinnut akissarsiassatut katillugit 1500 euro qulakkeerneqassapput (annerusumik akissarsititsisinnaanissaq sulissutigaarput, maannakkuugallartorli tassa neqeroorutigisinnaasagut)
6. Issittumi suleqatissannik attaveqarfissanillu nassaartornissarnik matumuuna periarfissinneqarputit, neriuppugullu Issittumi nunani assigiinngitsuni tusarnaarneqartalerumaartutit, immikkuullarissumillu angalaqataallutit.
7. Minnerunngitsumillu: The PanArcticVision tassaavoq aliikkusersuisartut aaqqissuussaat. Pikkunartumik mikisunnguamik issittumi inuiaqatigiinni 6.000-inik innuttalimmi festivalertitsisarnissaq sulissutigaarput. Taamatut aaqqissuussineq aatsaavissuaq misilipparput. Tamanna unamillernartuussaaq, tamattali ikioqatigiilluta Issittormiut tamaneersut katerisimaarfissaannik takorluugaq piviusunngortissavarput!

PanArcticVision-imik aaqqissuussivik; NORDTING
The Northern Assembly kiisalu Vadsø-mi Varangerfestivalen suleqatigalugu.
Suliariniakamut aningaasaliisuupput Arts Council Norway/Norge-mi Eqqumiituliortut Kattuffiat allallu.

nordting.no

varangerfestivalen.no

panarcticvision.org

Peqataarusukkuit erinarsuut uunga: apply@panarcticvision.org nassinniaruk.

!! Kingusinnerpaamik Marsip 14-ani nassiunneqassaaq !!