Qullissat sammillugit kulturisiorneq

Qullissat matuneraniit ukiut 50-inngornerat malunnartinniarlugu assinik saqqummersitsoqassaaq, atuagaq nutaaq saqqummissalluni, filmimik takutitsisoqassalluni aamma Vaigat’inik nipilersortoqassalluni.

Aamarsuarsiorfik Qullissat oktobarip ulluisa sisamaanni 1972-imi matuvoq, innuttaasorpassuillu taamani nuutsitaapput. Qullissat illoqarfiusimavoq eqeersimaarfiusoq, aamma kulturikkut, taamaalillunilu Qullissat nipilersoriaatsimik Vaigat-imik taasamik appisimaartarnermik immikkuullarissumik aallarniiffittut amerlasuunit ilisimaneqarpoq.

Qullissat matuneraniit ukiut 50-t qaangiunnerat malunnartinniarlugu Katuami oktobarip arfineq-pingajuani 2022-imi Qullissat sammineqangaatsiassaaq. Qullissat matunerata oqaluttuassartaa, aammali inui kulturiallu ilanngunneqassapput.

Pisussat allattorsimaffiat:

• 16.00 Aqqaluk Lynge aamma Teit Jørgensen Qullissani assilisimasanik saqqummersitsineq ammassavaat peqatigitillugu Qullissat pillugu atuagaq assitarpassualik nutaaq tamanut saqqummiutissallugu.
• 19.00 Filmi ”Nâlagkersuissut oKarput tássagôK” / ”Da myndighederne sagde stop” takutinneqassaaq.
• 21.00 Pele Møller band-ikkut qititsitsissapput Vaigat’inik nuannerluinnartumik appisimaassallutik.

Suliniut Qullissat matuneqarnera pillugu piviusulersaarusiamik 1972-imi assiliillutillu immiussisut suleqatigalugit piviusunngorpoq, uku:  Aqqaluk Lynge, Per Kirkeby, Teit Jørgensen aamma Peder Sakse.

Katuaq qaaqqusisuuvoq uku tapiisoralugit:

NAPA aamma Katuami pisussanut tapiisartut: GrønlandsBANKEN, Bank Nordik, Brugseni, Tusass, Permagreen, Royal Arctic Line aamma Air Greenland.