Ullut

Sumi: Hans Lynge Sal
Ulloq:
Pisigit
Sumi: Hans Lynge Sal
Ulloq:
Pisigit

Puisip Inorroortup Ernera 

Angut aajuitsumiittoq. Piniartoq. Kisimiittoq. Angut nipaatsoq, avatangiisimisullu imaannanngitsigisoq. Ullut ilaanni piniartilluni, nipimik tusaasaqarpoq. Pinngortitami nipit tamaasa ilisimagaluarpai, pisumili tusaasani takornarpaa. Nipi qaarsup sivingasup tungaanit tutsiuppoq. Qaarsorlu mianersorluni majuarfigaa, sinaatigullu alakkarami takulerpai arnat pinnersut, mattaangasut puisit amiisa qaleriiaakkat saavini qittattut. Arnat arlaata puisip amia qipittut imminut nermullugu ativaa, puisinngorlunilu. Immallu tungaanut aallarmat ilaasa malippaat. Angutip qitinnerani isiginnaariarlugu ameq atugaa tiguaa oqarlunilu ”nuliarilerlagit”. Allamik oqanngilaq. Arnallu akivaa: ”Aap, nuliarilersinnaavarma, kisianni puisip amia ukit arfineq-marluk qaangiuppata uannut utertissavat”. Ernertaarput atsikkaminnik, Oruk, taassumalu alliimigami ataatani piniaraangat ilagalugu ikiortalerpaa. Ukiullu arfineq-marluk pilluarlutik inuupput, arnap puisip napparsimalernerata tungaanut. Puisillu amia uterteqqusani pisariaqartippaa uumaannassaguni, kisianni uiata ameq tunniukkumajunnaarpaa. Erniusup angajoqqaami aaqqiagiinngissuteqarnerat imminnullu ungasillinerat misigaa, amerlu nassaareriarlugu anaanaminut tunniullugu, taamallu inuuneranik annaallugu. Arnarlu puisinut ilaquttaminut uterpoq erneratali paasivaa immami inooqqatigisinnaanagu, saniatigulli aamma ataatami orninnissaa kajumeriunnaarpaa. Taamallu ilaqutariittut ataatsimoorsinnaajunnaaramik, erniusup angajoqqaani tamaasa qimappai, imminerlu inuulerluni.
Isiginnaagassiaq islandimiut oqaluttuatoqaaneersuuvoq, isiginnaagassiarlu Kimmernap saqqummersitaaniit erinnat nunatsinniillu erinnat allat isiginnaagassiami atorneqarlutik.

Nunat avannarliit killiit suleqatigiinnerat
2018-imi maajip qaammataagaa, erinarsortartup isiginnaartitsisartullu Kimmernaq Kjeldsenip Ingo Putz, Marie Labs, taakkulu Theater Konstanz-imi suleqataat peqatigalugit qulaani oqaluttuaq assigiinngitsunngorlugu isiginnaartitsissutigivaat, taamallu suleqatigiinnerat pinngorluni. Kajungerivarput islandimiut oqaluttuatoqaasa itisilerlugit samminissaat ilanngullugit nunani avannarlerni oqaluttuatoqaatigisat. Siunnerfigaarpullu taasat aallaavigalugit immineq ilusilersuinissaq, sumiikkaluaraanniluunniit isiginnaartitsissusiarineqarsinnaasunngorlugit. Oqaluttuamilu aalisartoq piumatussutsiminik unitsitsisinnaanngimmat, allanngortiteraluni suliat nunarsuarmik aserorterinerujussuarmut sangutinneqarsinnaasunngorput. Taavalu nunarsuarmi isiginneriaatsit assigiinngitsut aallaavigalugit ilusilersuinikkut ammasumik akaareqatigiillunilu inuunissaq qitiusutut oqariartuuutigineqalerpoq. Katuami isiginnaartiitsinissanut atatillugu Kalaallit Nunaanni isiginnaartitsisartuullunilu nipilersortartuusoq ilisimaneqarluartoq Mike Fencker Thomsen nipilersoqataasutut oqaluttuartutullu peqataassaaq.

Kimmernaq Kjeldsen: Isiginnaartitsisoq, erinarsortoq.
Gregor Müller: Isiginnaartitsisoq
Mike Fencker Thomsen: Oqaluttuartoq, nipilersortoq
Lisa Rüppel: nipilersortoq
Bjōrg brjansdottir: nipilersortoq
Ilitsersuisoq: Ingo Putz

--------

Aprilip 27-ni - Nal. 19.00-20.15
Aprilip 28-ni - Nal. 19.00-20.15
Isersinnaasut ukiui: 7+
Inersimasut: 75 kr.
Meeqqat: 25 kr.
Oqaatsit atorneqartut: Kalaallisut, tuluttut, immannguarlu tyskisut