Ullut

Sumi: Paarlersuaq
Ulloq:
Pisigit

INUA

"INUA” Nuummi sisamanik nipilersortoqarluni ukioq 1982 aallartippoq inuttaralugit: Jorsi Sørensen bas aamma erinarsortoq, Niels Osterman tumerparpaartoq, John Hansen pattattoq tulleertoq aamma Jan Hansen guitarertuullunilu tulleertoq.

Kristinemutimi 1982-imi decemberimi nipilersornissamik neqeroorfigineqaramik, nipilersoqatigiit ataatsimik ilapput, tassa Ulf Fleischer erinarsortutut guitarertutullu ilagilerlugu. Taamatullu inuttaqarluni INUA 1984 tikillugu ingerlavoq.

Ulf Fleischer-illi 1984-imi Inua qimappaa kisimiilluni erinarsortarnini inittoraluttuinnalermat. Niels Ostermannilu aamma ukioq taanna ilaajunnaarpoq reggae-mik nipilersortartunut Aalut-kunnut ilanngulluni. Martin Chemnitz-illu Niels Osterman 1984-ip ukiaani taarserpaa, taamallu ukioq taanna Inua taaneqartutut inuttaqarluni saqqummeqqippoq.

1985-imilu annertujaamik angalasarlutik nipilersortaqattaarput Aasivimmilu 1985-imi peqataallutik, tassanilu ULOmi immiussanik saqqummiussisarfimmi inuit tunuliaqutaasut naapippaat, ULOlu tassaalerpoq Inua-kkut marlunnik saqqummersitsivigisaat ukuusunik, INUA (1987) aamma INUA - Kalak (1990).

INUAlu nipilersortartut peqatigiiffiata NNP-p immiussatut saqqummiussaani ”NNP-86” (1986) peqataapput taamallu Aasivimmi peqataaqqillutik (1987). Tamannali pitinnagu martsimi ukioq 1987 Inua Aasiannukarpoq immiukkiartorlugit 1982-ip 1987-illu akornani appisimaartarsimasat ilai, INUA – ULO 40 (1987), ULOp immiussiarfiani ”Aqisseq”-mi. Nipilersortartut peqatigiiffiat NNP suleqatigalugu Inuap aaqqissuuppaa ”Kalaallit Nunaanni angalaneq”, Nuummi 21. juni 1987 aallartinneqartoq nammassineqarluni 16. august 1987 tassalu angalanermi tassani Aasivik `87 ilanngunneqarpoq illoqarfiit makkuussut aqqusaajutigalugit: Qaqortoq, Maniitsoq, Sisimiut, Aasiaat, Ilulissat aammalu Uummannaq.

1988-imi Jorsi Sørensenip Inua qimappaa, sinneruttullu pingasuusut immiussassanik piareersaatigalutik ingerlaqqipput. Taannalu immiunneqarpoq Aasianni piffissap 1988-1990-ip iluani. Tassanilu Malik Høegh Jorsi Sørensen taarserlugu erinarsortuuvoq taamallu 1990-imi INUA-p saqqummiussaasa aappaat INUA – Kalak saqqummersinneqarluni. Inua nipilersoqatigiittut naggataarluni Nuummi ukioq 1990 ornigarneqaqisumik nipilersorpoq. Kingorna Inua qaaqqusatut peqatigiiffinni, politikkikkut suliniaqatigiiffinni, ilinniartoqarfinni, ataasiakkaanut aammalu nipilersortartunik nersornaasiinermi (2012) nipilersortarpoq. 

INUA Tupaarnaq erinarsortoralugu kingullerpaagallartumik nipilersorpoq novemberimi ukioq 2016. Tamanna pivoq Inua Nuummi nipilersortartut allat peqatigalugit Jorsi Sørensen, Danmarkimi napparsimalluni katsorsartinnerani, aningaasatigut ikiorniarlugu katersisitsiniarnermi.

    

G-60

G-60 Kalaallit Nunaanni rock-imik nipilersortartuni nuannarineqarnerit ilagivaat 80-ikkut 90-ikkullu nalaani. Nipilersoqatigiit 1983-imi pilersinneqarput, imatut inuttaqarlutik: Eigil Petersen Guitarertoq erinarsortorlu, Jacob Johansen Guitarertoq, Pele Madsen Pattagiaq, Mike Holm Bassertoq aammalu Hans Rosenberg Tumerparpaartoq. Nipilersoqatigiinni pingaarnerulluni inuttaavoq guitarertoq erinarsortoq taalliortorlu Eigil Petersen nunatsinni nipersornerup silarsuaani ilisimaneqarluartoq.

1986-imi nipilersoqatigiit imminnut atserput G-60 piffissamilu sivikitsumi Ulf Fleischer erinarsoqataasarpoq, taamaatimmallu Eigil Petersenip suliassaq tigoqqippaa. Ateq G-60 tunngaveqarpoq nutarterinermi politikki akerarineqaqisoq, allaat taaneqartartoq qallunaanngorsaaneq aallaavigalugu. Nutarterinermi politikkip Danmarkip nunarput 1953-imi immikkoortortaqarfittut inissimmagu (amt). G-60 nunap aqunneqarneranut nunaqartut peqataatinneqarpallaannginnerannut nipilersornikkut uparuaasuusarpoq inuiaqatigiit oqariartuutaat nipilersornikkut ingerlateqqillugillusooq. Saqqummertaleramik piffissami tassani nipilerinerup tungaatigut nutaaliortuupput.

Oktoberi qaammataani 1986-imi januari 1987 tikillugu G-60 Qilaat Musicimi Nuummiittumi immiussivoq saqqummersitseqqaarlunilu Kim Larsen teknikkikkut aqutsisoralugu. Nuuteq saqqummersitaq siulleq 1987-imi tigulluarneqarpoq nunatsinnilu tamani nuannarineqaqaluni. Nipilersoqatigiit nutaanik inuttalerlutik tassani saqqummerput Enoch Aqqa Lynge pattattoralugu Tuka Lynge bassertoralugu.

Januarimi 1989-imi nipilersoqatigiit aallartipput Namminersornerullutik Oqartussaq ukiut qulit siulliit ingerlasimanerat aallaavigalugu nutaanik nipilersugassanik sananiarlutik, inuusuttut isaannik takunninneq aallaavigalugu. Januaarimiit juuni tikillugu sulipput Namminersornerullutik Oqartussanik aningaasaliiffigineqarlutik. Nuuteeraq saqqummersinneqarpoq namminersorulernerup atuutilerfianiik 1979-imiit ukiut qulit qaangiummata. Naalakkersuisunut qaaqqusanullu assuartunut nipilersukkat tusarteqqaarneqarput. Juunip 20-ani 1989, aqaguanilu Inuiattut Ullorsiornermi innuttaasunut tusarnaartitsineqarput alutorineqaqisumik.

Nipilersoqatigiit Aasiannut immiussisarfik Aqisseq aqqutigalugu nipilersukkatik immiukkiartorpaat”Namminersorneq” teknikkut aqutsisoralugu Malik Høegh/G-60, Qilaat Music aqqutigalugu januaarimi 1990 saqqummerluni. Suliarinerani nipilersoqatigiit allanngoqqipput Eigil Petersen suli siuuttuuvoq erinarsortutut guitarertutullu Enoch Aqqa Nielsen uterpoq pattattutut, Jacob Søltoft guitarertutut ilanngussimavoq Tuka Lynge Joorsi Sørensenimit taarserneqarsimavoq. Hans Rosenberg Ove Heilmannimit taarserneqarluni.

Ukiut arfineq marluk nipaqanngeriarlutik 1997-mi G-60 saqqumersitseqqippoq ”Kinauvit?” nipilersoqatigiillu kingulliugallartumik saqqummersitaralugu. Nipilersorneq suliarineqarpoq Sermit Records ApS, immiussisarfik nutaaq Eigil Petersenimik Ole Kristiansenimiillu pilersinneqartoq. Tassani peqataapput Eigil Petersen, Jacob Søltoft Joorsi Sørensenilu. Aammalu ilaapput Nina Kreutzmann Jørgensen, Julie Berthelsen aammalu Krissie Berthelsen. Nina Julialu kingorna Kalaallit Nunaanni erinarsullaqqissutut tusaamasaalerput.

2007-imi nipilersoqatigiit saqqummersitseqqaarfianniit ukiut 20-t qaangiummata G-60 saqqummeqqippoq taallugu ”Namminiilivinneq”. Tassani nipilersukkat immiuteqqitat G-60-ikkunniit atorneqartut saqqummerseqqinneqarput, Ice Music Eigil Petersenimit pigineqartoq aqqutigalugu.

Ukiorpaaluit tusarsaanngeriarlutik nipaqallattaalerput aammalu eqqaaneqarluni 2018-mi nutaamik saqqummersitsissallutik neriorsuinikuullutik.

Ullumikkut nipilersortartut inuttaraai Ove Heilmann Tumerparpaartoq, Jorsi Sørensen erinarsortoq bassertorlu, Juaat Iversen guitarertoq aammalu Eigil Petersen erinarsorlunilu guitarertoq. Katuami tusarnaartitsinermi ilaqqissapput, tamanna ataani takuneqarsinnaavoq.

   

Ukioq manna tusarnaartitsineq kingulleq

INUA
Tulleertoq: Tupaarnaq Ingemann Mathiassen
Kitaarerlunilu tulleertoq: Malik Høegh
Erinarsorlunilu qatitoortoq: Joorsi Sørensen
Tulleerlunilu tumerparpaartoq: Nino Fencker
Pattallunilu tulleertoq: John Hansen
Kitaarerlunilu tulleertoq: Jan Hansen

G-60
Erinarsortuullunilu kitaarertoq: Eigil Petersen
Pattattoq: Nukannguaq Geisler
Ataasiakkaarisoq: Juaat Iversen
Erinarsorlunilu qatitoortoq: Joorsi Sørensen
Tumerparpaartoq: Ove Heilmann
Kitaarertoq: Jakob Søltoft

Paasissutissat:
Tusarnaartitsineq: Decembarip 29. 2017
Matut ammassapput nal. 21:00
G-60 nal. 22:00
INUA nal. 00:00
Pisiaarnermi: 250 kr.
Matumi: 300 kr.
Bilitsit nittartakkakkut pisiareriarlugit isernermi maileq imal. pappiliaq anisinnikoq takutillugu isertoqarsinnaavoq, kiisalu Katuap saaffiginnittarfiani aamma pisisoqarsinnaalluni.

   

15-17-illu akornanni ukiullit inersimasumik peqateqarlutik isersinnaapput