Ullut

Sumi: Paarlersuaq
Ulloq:
Pisigit

Mugison
Nuannaarutigeqaarput nunatsinni siullerpaamik islandimioq taalliortartoq erinarsortartorlu Mugison tusartissinnaalissagatsigu.

Mugisonimi Facebokkimi 27.000-niit malinneqarpoq, nipilersortartuunngilarlu nalinginnaasuusoq. Ukiummi ingerlanerini islandimiusut tuluttullu erinarsukkani
aqqutigalugit tassaalersimavoq inuk pingaaruteqartoq.
Nipileersoriaasia folk aamma rock´n´roll-iuvoq blues-imik akoqalaarluni.

Mugisonip saqqummiussimasai makkuupput:
2003: Lonely Mountain
2004: Niceland (Soundtrack)
2004: Mugimama Is This Monkey Music?
2005: Little Trip (Soundtrack)
2007: Mýrin (Soundtrack)
2008: Mugiboogie
2009: Ítrekun
2011: Haglél
2016: ENJOY!

Islandimi 15-inik ikinnerunngitsunik Iceland Music Awards-inik pinnattarsimavoq ilaatigut pisimallugit ‘Performance of the Year’, ‘Best Song’, ‘Album of the Year’ aamma ‘Most Popular Performer’.

Mugison tiguartinnartuuvoq tusarnaartitsigaangami alaruminaatsuusoqisorlu. Tusarnaartitsillaqqilluinnartuuvoq assullu qungujunnartunik akoorillaqqilluni. Taamaattumik qularinngilarput, nunatsinni tusarnaartut takugunikku erngerlutik ”asannilersoorfigiumaaraat”. 

Gerth
Gerthi (Gerth W. Lyberth), tassaavoq kalaaleq nipilersukkanik suliaqartartoq qangaammalli qilanaaralugu utaqqinikuusarput. Youtube-ikkut nipilersukkanik arlaqaqisunik saqqummiussaqartarnikuuvoq, ilalu nutaaliorluni pilersitsillaqqeqaaq. Gerth nammineq erinniortarpoq namminerlu isiginnaarneqarsinnaasunik immiussisarluni.

Gerthip nuuteeraq immiussaa ateqartoq ’Anorisaat’ ukiuni kingullerni 15-it missingini suliarisimasaanik imaqarpoq.

Nipilersoriaasia pop-iuvoq nutaaliaasoq elektroniskinik ”tillernilersugaasoq”, qitiullutik erinarsornera guitarerneralu.
Nipilersugaalu up-beat-iupput tusaruminartunik akuugaallutik, taakkunani erinnat tusaaqqoornartut ersersinneqarlutik.

Gerth pinngortitsisartuuvoq suliarpassuaqartoq ukiorpassuarni suliarisimasaminik immersugaasumik immiussaminik saqqummersitseqqammersoq, taamallu alutornartumik, allanngorartumik, nunatsinni nutaaliaasumik nipilersoriaaseqarluni, saqqummiussisoq. Saqqummersitaq aprilip qiteqqunnerani saqqummersoq erinnanik qulinik imaqarpoq.

’Anorisaat’ Gerhip siullermeersumik saqqummiussarivaa, tassanilu erinnat ilaat qangali suliaasimapput, nutaanik akoqarlutik, malunnarporlu saqqummersitaq pimoorussilluni suliaasoq. 

Gerth ilaatigut aaqqissuussani minnerusuni nammineq sassartarpoq, assigiinngitsuniillu tusarnaartitsisarnini takussassiatullu immiussani aqqutigalugit nuannarinnitseqarlunilu malittarineqalersimalluni. Nuannarinnittaasalu minnerunngitsumik alutorisarpaat nipilersorluni takusaasiarisai aliikkusersuutaalluartut, nuannaartitsillutillu eqqarsalersitsisartut.

Nuannaarutigingaarparput Gerthip saqqummiussaqarnerminut atatillugu Katuami tusarnaartitsinissaa.