Nuuk International Film Festival 2019

Nuuk International Film Festival pingajussaa septembarip 18.aniit ingerlanneqassaaq. Filminik immikkuullarissunik soorlu Canadamiit The Grisslies aamma nunatsinniit suliarineqarsimasunit AQUARELA  Kalaallit Nunaanni takutitserngaartoqassaaq, kiisalu filmit naatsuliat arlallit perngaamik takutinneqassallutik.   

Ukiut pingajussaanik Nuuk International Film Festival – iml. NIFF2019 Katuami ingerlanneqassaaq – filmiliortarneq persuarsiutigineqassalluni pingaartumik nunatsinneersut issittormiuneersullu nalliuttorsiutigineqassallutik. Festivalertoqarnissaa septembarip 18.aniit 21.anut ingerlanneqassaaq ullullu sisamat ingerlanerini filmit tallimat nutaat takutinneqassallutik, naatsut pisimasulersaarutillu amerlasuut, meeqqanut allakajaamik pilersaaruteqarpoq, titartakkat aallaavigalugit filmiliornermik (animation) sullivik kiisalu filmi pillugit oqallinnerit assigiinngitsut marluk.

Pingasunngorneq septembarip 18.ani nal. 19 festivali Katuap pisortaannit Arnakkuluk Jo Kleistimit aamma NIFF pisortaannit Pipaluk K. Jørgensenimit ammarneqassaaq. Nal. 19:30 filmi ammaanersiut Aquarela takutinneqassaaq, kalaallit nunaaneersunit Ánorâk Film peqatigalugu suliarineqarsimasoq, decembarimilu Europamiut Oscarianut, European Film Award unammeqataassalluni.

Filmit naatsuliat takuteqqaarnissaat
Filmit tallimat saniatigut NIFF2019 filmit naatsut immikkoortuni marlunni takutinneqassapput Canadamiut Saamit kalaallillu naatsuliaanik takutitsiviusussat. Pingaartumik kalaallit filmiliaat alapernaattariaqassapput, tassami marluk siullerpaamik takutinneqassammata. Filmimi With Darkness I Grew Into A Midnight Sun, Jens-Christian Lyberth Lennertimit suliarineqarsimasumi assiliisartup kalaaliusup Inuuteq Storch assilisai aqqutigalugit eqqumiitsuliornikkut silarsuaanut alakkaassaagut, Hedtoft Inuk Jørgensenimit suliarineqarsimasukkut ukiut 60 matuma siorna pisimasumut utersaassaagut, umiarsuup Hans Hedtoftip 1959-mi alianaqisumik umiuneranut. Inuk Jørgensenip naatsuliaasa siulia, Home, 2018-mi Nuuk International Festivalimi takuteqqaarneqartoq, nunarsuarmi tamani amerlasuunik nersornaaserneqarsimavoq.

Filmfestival meeqqanut akeqanngitsoq
Pilersaarutit salliunneqartut saniatigut NIFF2019 aamma meeqqanut tunngasumik  immikkut pilersaaruteqarpoq, tamanna septembarip 19.-anit 21.anut ingerlanneqassalluni. Tassani filmit titartakkat Europameersut Canadameersullu takutinneqassapput kiisalu Nunavummi Eqalunniit Taqqut Productionsimit takkuttoqassaaq. Festivalip nalaani sullivimmi titartakkat aallaavigalugit filmiliorneq aamma annertuumik sammineqassaaq, fransk ambassade, Goethe Instituttet aamma The Animation Workshop suleqataasaralugit, tassani Danmarkimi franskit aallartitaat Caroline Ferrari tikeraartorineqassaaq.

Ilisimasalinnik oqallitsitsinerit
Kiisalu ilisimasalinnik oqallitsitsinerit marluusut septembarip 19.ani aamma 20.ani Katuap inersuaaraani pisussat pilersaarutaapput, nal. 15-16 ingerlanneqartussat. Filmiliortartoq Emile Hertling Péronard oqallissaarisoralugu; filmi ima isigalugu; nation builder, allamiuullunilu Kalaallit Nunaanni Issittunilu filmiliorniaraani qanoq pissusilersorsinnaaneq pillugit oqallittoqassalluni.

Innersuaq & NIFF 2019-mi Naliliisartuisa Akissarisitsinerat
Festivali arfininngornermi septembarip 21-iani nal. 19:00 naggataarnersiortitsissaaq, tassanilu akissarsititsinerit pissallutik, FILM.GL Innersuaq tunniutissavaa kiisalu NIFF 2019-mi Naliliisartuisa Akissarisitsinerat aamma tunniunneqassalluni.
Akissarsititsinerit naammassippata nal. 20:30 festivalimi filmi eqqartorneqarnerpaaq, The Grizzlies, takutinneqassaaq. Ukiut 2000-ikkut aallartinnerisa nalaani Kugluktuk, Nunavummi piviusut tunngavigalugit sanaaq, The Grizzlies timersornermi unammiuaarnermik ajugaanerinnaanngitsumik tunngaveqarpoq. Nunani issittuni inunnit amerlaqisunit atugaasut, pissaaleqineq avinngarusimanerlu takutinneqarpoq. Filmi arlaleriarluni Canadami nunanilu allani akissarsitinneqareerpoq, akissarsitinneqarnissaminullu innersuunneqarneri suli amerligaluttuinnarlutik.

NIFF 2019 programme

NIFF 2019 Kids programme

TICKETS 

Nuuk International Film Festival Facebook

Nuuppoq ...

Nutaarsiassat nalunaarutillu

Emailit allagut, mailimik nassissavatsigit ilitsersuillutalu