Oqalugiartoq: Kemisk biologimi lektori Thomas Bjørnskov Poulsen, Institut for Kemi, Aarhus Universitet.

Oqalugiarnissaq oktobarimi nalunaarutigineqarnikuugaluarpoq teknikkikkullii ajornartorsiuteqarneq pissutaalluni oqalugiarnermik allamik taarsertariaqarsimalluni. Oqalugiarnissarli tassa maannakkut ingerlanneqarsinnaanngorpoq.

Nakorsaatit sunniuteqarluartartut inuiaqatigiinni nutaaliaasuni tunngaviusumik pisariaqartinneqarluinnarlutik ingerlatitseqataasunut ilaapput - qangaanerusoq bakteerianut aseruuttoornernullu akiuussutissaqanngikkallarnerata kiisalu kræfteqartunut kemoterapeeqanngikkallarnerata nalaanni inuunerup qanoq ittuusimanissaa massakkut takorlooruminaatsorujussuuvoq.

Unnumanna oqalugiartup saneqaatit minnerpaartaasa - molekylit - silarsuaannut ingerlatissavaatigut - uumassusillit uagut peqqissutsitsinnut ulorianartorsiortitsisinnaasut nungusarniarlugit nakorsaatissiassanit pinngortitami nassaassaareersunit katsorsaasiornermik ilisimatusartartut ineriartortitsinerat sammineqassaammat.

Nakorsaatissiassat pinngortitameersut ilaat molekyletaqarput sannamikkut ima paasiuminaatsigisunik, allaat teknologi nutaaliaanerpaaq atorluguluunniit paasiniaanerit iluatsikkuminaassinnaasarlutik, tassa molekylit ilaasa sannaat suliariuminaatsuullutillu suussusersiuminaatsuusarmata. Oqalugiarnermi matumani nakorsaatissiassat pinngortitameersut suminngaanneersuunerat, molekyliisa qanoq sanneqarnerat qanorlu allanngortiterneqarsinnaanerat tusagaqarfigissavarput.

Sananeqaatit pinngortitami nassaassaasut cellellu proteiniisa qanoq imminnut sunniivigeqatigiittarnerannik ilisimatusartartut paasisaqarnitik tunngavigalugiy sananeqaatinik tamakkuninnga inuunitsinnik sivitsuisinnaasunik nappaassuarmullu kræftimut akiuussutaasinnaasunik nutaanik qanoq ineriartortitsiniarneqarnersoq aamma tusagaqarfigissavatit.

Pinngortitaq pillugu ilisimatusarnermi paasisat tunngavigalugit tamanut ammasumik oqalugiartitsisarnerni tulleriaani ukunani Pinngortitaleriffik Aarhus Universitetilu suleqatigiillutik oqalugiaammik nutaamik saqqummiussisuupput. Thomas Juul-Pedersen Pinngortitaleriffimmeersoq aallarneereerpat unillatsiarnermi kaffeqarlunilu teeqassaaq. Arhus Universitetimi oqalugiartitsisinermit videoliuut atorlugu immiussamik isiginnaarneq akeqanngilaq.

Nuuppoq ...

Nutaarsiassat nalunaarutillu

Emailit allagut, mailimik nassissavatsigit ilitsersuillutalu