Nuka Alice Lund

 

Nuka Alice Lund tassaavoq Inuit qilaasersortarnerannik Kalaallit Nunaannilu inngerutinik ingerlatitseqqittut ilaat.

Inngerutit ilaat ilinniartitsigaangami allanut ingerlateqqittarpai, namminerlu aamma inngerusiortarluni. 2009-I qilaasersorneq Pauline Lumholt-imit ilinniarpaa ukiorlu taanna aamma inngerusiani siulliit pilersillugit.

Nuka Alice-p inngerutit atortakkani amerliartuaartippai maannalu nammineq allallu peqatigalugit inngerusiani aliikkutassiarisarpai oqaluttuanik akoorlugit.

Ullumikkut Nuka Alice-p qilaasersorneq kisiat aallutaraa, inuunermini killiffini aliikkusersuinermut, nutaanik pinngortitsinermut qilaasersornermillu ilinniartitsinermut atorpaa, Kalaallit Nunaanni Inuit qilaasersortarnerat inngertarnerallu ingerlatsiinnaqqullugu. Ileqqut taakkua UNESCO-p 2021-mi Nunarsuarmioqatigiit kulturikkut kingornussaattut tigussaanngitsutut nalunaarsukkanut ilanngunnikuupput. Nuka Alice Inuit qilaasersoriaasaat assigiinngitsutigut saqqumiuttarpaa.

2017-imi Inatsisartut upernaakkut ataatsimiinnermik ammaanersiornermi Nuka Alice Tunumiorlu qilaasersortartutut ataqqineqartoq Anda Kuitsi ilagalugu siullersaallutik qilaasersorlutik aammaapput. Nuka Alice aamma  Artic Sound Music Festivalip 2014-imi aallartinneraniit ammaalluni aliikkusersuisarnikuuvoq.

Nuka Alice Knud Rasmussenip højskoleani ilinniartitsisuuvoq, The music school Serravik-mi kiisalu Nunatta Isiginnaartitsinermik Ilinniarfiani avataaniit ilinniartitsisutut sulisarluni.