Simon Lynge

Simon Lynge-p nipilersugai ilukkut tiguartinnarput, tusarnerlutik kusanarlutillu, naak sakkortorpalullutillu sapiiserpaluttaraluarluni. Taalliortorpalaartumik taalliortarpoq, ilumoorpalullunilu nammineq misiginikuusani aallaavigisarlugit, ilaanni ilukkut taartut kiisalu unammillernartut allanguisuusut ilannguttarlugit. Silappaarippalulluni nunarsuatsinnik qimerluuisarpoq inuppalaarnerlu erinarsuutimini akuleruttarlugu kiisalu inuunerup kusanartortai tusarnaartoq silaannarmut nuannersumut pisittarlugu, itisuumilluunniit aliasunneq misigigaluarlugu. 

Nualluutip tuniluunnera pissutigalugu ukiut marlungajaat kinguartoorlutik kiisami 2021-mi oktobarimi nipilersoqatini The Martial Hearts (Anders Pedersen, tumerparpaartoq, Nicolai Land, bass, kiisalu Richard Lobb, guitarerlunilu pattagiartoq) peqatigalugit København-imi immiussisarfimmi Viktoria Studios-imi immiussilerput Simon-ip najugaani illoqarfimmi Port Townsend-imi, WA-mi, Rainshadow Recording-imi immiussat ilanngullugit. Immiussaat 2022-mi saqqummertussaq.

Simon Danmark-imi Kalaallit Nunaannilu peroriartorpoq. Issittumi angerlarsimaffini, pinngortitaq angeqisoq allanngortinneqanngitsoq kiisalu itisuumik nunap uumasuisalu attaveqarfiginerat  sakkortuumik atassuteqarfigisutut misigijuaannarnikuuaa. Simon-ip nipilersortarnermini Kalaallit Nunaanni siuaaminit pigaa, tassami ataataa supputaasartartutut tusaamaneqarluarpoq, aataavalu erinniartuullunilu Qaqortumi erinarsoqatigiinni ullumikkuut suli ingerlasuni siuttuunikuulluni. Simon nukappiaraalluni Danmark-imi oqaluffimmi erinarsoqatigiinni peqataasalerpoq, teenagerinngorlunilu Jimi Hendrix, The Doors, Simon & Garfunkel kiisalu Crosby Stills & Nash, allallu nuannaartoralugit nammineq erinarsugassiortalerluni.

Simon nipilersortarnermigut siullermik København-imiippoq, kingornalu Tuluit Nunaannut kiisalu USA-mut angalasalerluni; saqqummersitaa siulleq London-imi Sunday Times-ip taavaa “qeqertamiit silaannarissumik”. Saqqummersitaa, The Map of Your Life, 2018-imi New York-imi Independent Music Awards-imik nersornaasigassatut piukkunneqarpoq. USA-mi tv-kkut filiminilu erinarsuutai arlallit atorneqartarput, BBC Breakfast TV peqataaffiginikuullugu, Glastonbury Festival-imi peqataanikuulluni, Emmylou Harris angalaqatiginikuullugu kiisalu nipilersuutini saminngikkaangamiuk arsaattarfimi naapitassaasarluni...