Uani projektimi elektroniskimik nipilersortartut peqatigalugit visualimik aaqqissorluakkamik koncertiliornissaq anguniarneqarpoq, tamannalu Hans Lyngep Inersuani takuteqqaarneqassalluni. Nipilersortartut aamma rappersinnaasut erinarsorsinnaasullu inuusuttut peqataanissamut maanna periarfissippagut.

“Nipi Uummartillugu”-mi inuusuttut nipilersortartut tusarnaartitsinissamut piareersarnermi peqataatinneqassapput. Tusarnaartitsinermi suliarilluakkami, seqersitsinermik aamma qullilersorluakkamik scenemut qaqisinnaanissaanut periarfissaqarssapput.

Nipilersullaqqissunit tamatigoortunik ilinniartinneqassapput, nipilersornermilu ingerlaarfissanik siunissami atorsinnaasaannik tunineqassallutik.

Tusarnaartitsineq pingaarnertut meeqqanut inuusuttunullu saaffiginnippoq tamanulli peqataaffigineqarsinnaassalluni.

Inuusuttut pikkorissarneqassapput scenemiinnermi peqataasinnaatilerlugit, aammattaaq nipilersortartut peqatigalugit nipilersuusiornermi workshopeqassalluni.

Peqataasussat

Hans-Ole Amossen, “Da Bartali Crew”

Hans-Ole eventteknikeritut nipilerinermi ilinniarsimasuuvoq nipilersortartuullunilu. Siornatigut nipilersortartut assigiinngitsut suleqatigisarsimavai, nunanilu arlalinni nipilersortarsimalluni. Nipilersortartutut ineriartornermini isiginnaagassianut allarpassuarnullu nipilersuusiortartuuvoq.

Siornatigut aamma inuusuttunik pikkorissaanernut ilinniartitsisuusarsimavoq, soorlu NIPITU kujataani inuusuttunut pikkorissarfik.

Uanilu projektimi nipilerineq, nipilersuusiorneq, visual koncertillu aaqqissorneranut peqataassaaq.

  

Anda-Otto Schmidt, ”Andachan”

Andachan massakkut nunatsinni elektroniskimik nipilersuusiortartut nuannarineqarnerpaat

ilagivaat, qanittumilu saqqummersitaa ”Kisivit” Tuutu peqatigalugu assut inuusuttorpassuarnit nuannarineqarpoq. Andachan kisimiilluni appisimaartaraluarluni aamma allanut

nipilersuusiornikkut aaqqissuisutut, tassa produceritut pikkoriffeqarpoq. Tassanilu Finni peqatigalugu saqqummersitseqataavoq aamma inuusuttorpassuarnik nuannarineqaqisoq.

Uanilu projektimi nipilersuusiorneq, produceriuneq, animationiliornerlu sammisarissavai.

 

Jensia Højgaard Dam, ”Jensia”

Jensia nipilersortartut nutaat ilagivaat, ukiormannalu siullermeerluni saqqummersitsisimavoq nammineq taalliarisimasaminik, taannalu assut tigulluarneqarsimavoq.

Jensia taalliortuuvoq, erinarsortartuuvoq aamma nipilersornermik ilinniarfimmi ilinniartitsisuulluni.

Uanilu projektimi taalliortutut erinarsortutullu peqataassaaq.

 

Naleraq Eugenius

Naleraq uani projektimi akisussaasuuvoq. Teaterteknikeritut ilinniarsimasuuvoq, qullilerinerlu misilittagaqarfigalugu. Qullilerineq annertuumik sammisarigaluarlugu, seqersitsinermut tunngasut annertuumik sammisarivai, ineriartorfigalugillu. Taannalu massakkut ineriartorteqqillugu uunga projektimut nipi atorlugu kattunniarpai. Naleraq siornatigut annertuumik qulliit atorlugit eqqumiitsuliorneq sammisarisimavaa, isiginnaagassianullu arlalinnut qullilerisuusarsimavoq akisussaasuusarlunilu.

Qinnuteqarnermi uku ilanngunneqassapput:

  • Atit
  • Ukiutit
  • Telefonnormut
  • E-mail
  • Sooq peqataarusuppit?
  • Nipilersornermi qanoq misilittagaqarpit?

Peqataasussanut piumasaqaatit:

  • 15-23 akornanni ukioqassaatit
  • Nipilersorneq, elektroniskinik nipilersuusiorneq, erinarsorneq, erinarsoqatigiinneq taalliornerlu misilittagaqarfigilaareernisai piumasaqaataavoq.
  • Piareersarnermi ullut tamaasa peqataasinnaassaatit ulluni 19-23 juni aamma 3-7 juli nal. 10:00-16:00 kiisalu tusarnaartitsinermi juulip 8-ni.

Peqataanissamut qinnuteqarfissaq kingusinnerpaamik 8. juni 2023. Qinnuteqaat uunga nassiunneqassaaq: musiccoordinatorkatuaq.gl.

Toqqagaasut qinnuteqarfissap kingorna paasitinneqarumaarput. 

Aningaasaliisut: Napa, Grønlandsbanken, Bank Nordik, Brugseni, Tusass, Royal Arctic Line, Air Greenland

Eqqumiitsuliornermik aningaasaateqarfik, Tips & lotto pulje C, Julemærkefonden

Nuuppoq ...

Nutaarsiassat nalunaarutillu

Emailit allagut, mailimik nassissavatsigit ilitsersuillutalu