Nuummi eqqumiitsuliornermik ilinniarfik eqqumiitsuliortunit Hans Lyngemit Bodil Kaalundimillu 1972-imi uffartarfikumi assiliartalersuiffittut pilersinneqarpoq. Eqqumiitsuliornermik ilinniarfik ukiut ingerlanerini ineriartortuarpoq eqqumiitsuliortunut anguniakkat pitsaasut anguniarneqartuarlutik.

Ilinniarfik 1981-imi Namminersornerullutik oqartussanut suliffeqarfittut pilersinneqarpoq ilinniartunut ukioq ataaseq tunngaviusumik eqqumiitsuliornermik ilinniarfittut aaqqissuunneqarluni. Ukiut ingerlanerini eqqumiitsuliortunik assigiinngitsunit ingerlanneqartarpoq soorlu ukuusut: Hans Lynge, Emil Rosing, Ejnar Heilmann, Jessie Kleemann 1991-imiillu 2020-mut Arnannguaq Høeghimit ingerlanneqarluni maanakkullu ittuugallartoq Peter Kristiansen.

Ukiut tamaasa ilinniartunut tallimanut inissaqarpoq, taakkualu sulianik nassiunneqarsimasunit nalilerneqarlutik toqqarneqartarput. Ilinniartut titartaanermik, qalipaasersuinermik, akvarelinik, akryl atorlugu qalipaanermik, qiperugaliornermik, mixed medianik suliaqarnermik naqitseriaatsinik assigiinngitsunik ilinniartinneqartarput. Ilinniarfimmi ilinniartitsisut tikeraartut nunatsinneersut nunattalu avataaneersut ilinniartut teknikkikkut periusaanik ineriartortitsisaqaat anersaakkullu aqqutissiuisuusarlutik. Tamanna ilinniartunut ataasiakkaanut nunattalu kulturinut nukittorsaaqataavoq. Ilinniartut ukioq ataaseq ilinniartooreerlutik ukiup ingerlanerani suliatik junimi Katuami saqqummersittarpaat.

Ilinniarfimmi 1981-imiit ilinniartut inuusuttut 196-it sineriammit tamaneersut ilinniartuutigereerpai, taakkununngalu oqaatsinik pikkorissuusut nunatta avataani, soorlu Danmarkimi, Sverigemi, Norgimi, Finlandimi, Englandimi, Islandimi, Canadami USA-milu eqqumiitsuliornikkut ilinniarnertik ingerlateqqittareerpaat.

Eqqumiitsuliornermik ilinniarfik Nuummi John Møllerip aqqutaani inissisimasoq ullutsinni piumasaqaatinut naleqqersuunneqarsinnaanngilaq – ukiullu arlariit taamatut inissisimanikuulluni. Ilinniarfiup Katuamut nuunnissaanik pilersaaruteqarneq 2000-mi politikkikkut aalajangernermi unitsinneqarpoq. Ilinniarfiup eqqumiitsuliornermut ilinniarfissuartut inissisimalernissaa qaqugu inissikkumaarnersoq suli nalunarallarpoq.

Ukioq manna ilinniartut ukua saqqummersitsissapput:
Uiloq Johansen
Nivikka Abelsen
Mina N. Benjaminsen
Naja Poulsen
Nicoliinnguaq Cortzen (Nico)

 

 

Naja Poulsen. 22 år.  Nanortalik Nuumi peroriartornikoq.

Qalipaatit, nunarsuarmiitut silarsuarmiitullu sunaluuniit, assit, inuit timillu, uumasut, sunaluunit isumassarsiffigisarpakka.

 

 

Nivikka Abelsen 20år, 3922 Nanortalik.

Angalaneq, pinngortitaq, avatangiiseq, illoqarfiup iluani, eqqumiitsuliat, eqqumiitsuliortut qalipaatillu isumassarsiffigisarpakka.

 

 

Mina N. Benjaminsen 55 år Sisimiut Narsami peroriartorpunga.

Nuna pinngortitaq avatangiiserlu ,uumasut, naasut, qanga atortorisimasat isumassarsiffigisarpakka.

 

 

Nicoliinnguaq Cortzen 31 år Qasigiannguit, Ililissanilu peroriartorpunga Autitisk trækkertuuvunga

Nuna, Bigfoot, Anime, Manga, Japan, Illullu isumassarsiffigisarpakka.

 

 

Uiloq Johansen, 21 år, Upernavik

Pinngortitaq, ulluinnarni isigisat allamiit qiviarlugit eqqumiitsuliortullu allat isumassarsiffigisarpakka.

Nuuppoq ...

Nutaarsiassat nalunaarutillu

Emailit allagut, mailimik nassissavatsigit ilitsersuillutalu