Isigisat sunneeqatigiinneri/ Visuel synergi
 8. November - 6.december
”Isigisat sunneeqatigiinnerat ima paasisarpara isigisat marluk arlallilluunniit pinnguaqatigiileraangata, imminnullu nukittortillutik saqqummeralertarput takusassanik immikkoornerminnit nukittunerulerlutik”. Buuti Pedersen

Inuttut ilaatigut aqqusaagassaqartarpugut allannguingaatsiartunik, allannguutit ilaat qanigisatsinniinnaq takuneqarsinnaasarput. Ilaannili ammartoqartarpoq eqqumiitsuliornikkut piorsarsimassutsikkullu saqqiummiutassanik pilersitsisumik, tassalu saqqummersitat inuunermik allanngortoqarujussuarnerata kinguneranik Buuti Pedersenip suliai takuneqarsinnaapput saqqummersitsinermi qulequtsikkami”Isigisat sunneeqatigiinnerat/Visuel synergi”. 

Buuti 2014-imi Qaqortumi aallaaveqarpoq, aalajangersimavirli Danmarkimi Sjællandip kujasissortaani piffissap ilaani najugaqartassalluni. Buutip Kalaallit Nunaanni pinngortitaq isumassarsiorfigisarpaa, nuunnermili kingorna aamma Danmarkip kusanassusia isumassarsiorfigisalerpaa eqqumiitsulianillu arlalinnik pilersitsinermini avatangiisini nutaat aallavigaluit suliarisimasani takutissavai.

Isisginnaartussat malugisinnaassavaat Kalaallit Nunaata pinngortitaa isumassarsiorfigalugu suliat alutornartumik allanngortut, tassami Danmarkip pinngortitaa avatangiisillu Buutip isumassarsiorfigalugit suliarisalermagit.

Saqqummersitat ilagaat qalipakkat tallimat angisuut nunamik takutitsisut, igalaaminermik eqqumiitsuliat aammalu imilertakkanik qalipakkat mikisut silaannarsuaq Kalaallit Nunaata Danmarkillu akornaniittoq isumassarsiorfigalugu qalipataasut.

Buuti Pedersen pillugu
Buuti Pedersen Kalaallit Nunaanni eqqumiitsuliortunut akimasuunut ilaavoq, piorsarsimassutsip iluani assigiinngitsorpassuarnik suliaqartartoq. Eqqumiitsuliortuunermini Kalaallit Nunaanni pingaaruteqaqaaq,ukiullu 30-t sinnerlugit suliaasa nunarput tamaat angusimavaat.

Suliarpassui pinnersagarpassuilu sumiluunniit takussaapput piumassuseqarneralu takuneqarsinnaavoq misigissutsinik attuisarnerani. Suliarisartagai angerlarsimaffinni, ministerit allaffiini, frimærkini, meeqqanut atuakkani, telefonbogini kiisalu Alluitsup Paani oqaluffimmi Katuamilu takuneqarsinnaapput.

Buutip ukiut ingerlaneranni eqqumiitsulioriaatsit assigiinngitsut misilerartarsimavai, uterfigiuaannarpaali akrylimik imilertakkanillu qalipaaneq. Akrylimik qalipagai

qalipaatigissut qalipaatigingaaramik allaat ingasattajaarnertut isigineqarsinnaapput, kisianni suliarisarpai qalipaatit suleqatigiilersillugit kusarnartumillu inertarlugit. Qaamasoq taartorlu atussallugit nuannarai. Aamma qalipaatit imminnut akerleriittut atussallugit nuannarigaa takuneqarsinnaavoq nannut pinnguartut isiginnaaraanni. Buutip ilisarnaatigaa qalipakkani uumassuseqartilertaramigit: Pinnguartut, qitittut allaallu paasut qalipaanermini qalipaatit sakkortuut atorlugit ersersittarlugit. 

Buuti ukiuni kingullerni amerlasuunngortuni Kallallit Nunaanni eqqumiitsuliornerup kulturilerinerullu silarsuaani suleqataavoq. Eqqumiitsuliortutut aammalu Eqqumiitsuliortut Peqatigiiffiani KIMIK-mmisiulittaasutut suleqataanermigut malunnaatilimmik peqataavoq.

Najukkamini innuttaaqataasut akornanni suleqataajuarpoq saniatigullu ilinniartitsisarluni.

Ammaanersiorneq
Uiloq: Novemberip 8-ani 2018
Nal:16.00
Sumiiffik: Katuaq eqqumiitsulianik saqqummiisarfia

Nuuppoq ...

Nutaarsiassat nalunaarutillu

Emailit allagut, mailimik nassissavatsigit ilitsersuillutalu