Ivínguak Stork Høegh

Ivínguak` Stork Høegh (in.1982) assinik digitaliusumik katiterilluni ileqquusumik inuit kulturiat nutaaliaasumik silarsuarmioqataanermut sanilliullugu suliaqartarpoq. Naakkittaassuseq sakkortussuserlu, sallaatsuuneq misikkarissuserlu ataatsikkut ersersinniartarpai. Ivínguup assit pioreersut katitikkamini atortarpai – sinneri akuerineqarluni atortarlugit. Katitikkaminut uteqqiattumik tunuliaqusiukkajuppai qarmat, ungalut sakkortuumik sikalasumillu qaallit. Nammineq oqartarpoq sakkortorpasissut nuannaralugit. Illoqarfimmi ingerlatilluni aqqutaani siumukkani qarmat allallu qanittunnguanngorlugit assilisarpai – Nuummi allanilu illoqarfissuarni. Kalaallini inuiaqatigiinni oqallinnerit politikkikkullu oqariartuutigineqartut katiterlugit assilialiamini ersersinniartarpai. Ivínguup kalaallisut rap`imik erinarsuusiat isumassarsiffigalugit immersorneqaatigisarpai, taakkumi nipangiusimaannakkanik agiortuartuupput soorlu pinngitsuuisinnaannginnermik- imigassamik atornerluinermik, sumiginnaanermik, imminut toqunnermik imaluunnit politikkikkut akisussaassuseqannginnermik ilatsiinnarnermilluunniit. Assini katitigaani sammineqartartoq aamma kulturikkut kinaassutsimiippoq; kikkuuvugut, suminngaaneerpugullu? Ivínguak` Stork Høegh Nuummi Eqqumiitsuliornermik ilinniarfimmi, Aarhus Kunstakademiimi, Aarhus/Københavnimilu Mediegrafikeritut kiisalu Motiongraphic-ritut ilinniarsimasuuvoq.

“Qasapi nuannersumik pillugu”

Uanga nammineq nuannarisuuara suulluunniit illuatungilernissai. Taamaasillunga uani qulequtaliussanni “Qasapi nuannersumik pillugu” ima paasisariaqarpoq Qasapip inuunerisimasaa sakkortusinnaasoq ulluinnarni taamanikkumi “najorlugu.” “Najornerani” inuuneq oqittoq, nuannersoq illarnarsinnaasorlu peqatigalugu suliat pinngorartinneqartut. – Ivínguak´Stork Høegh

Aningaasaliisut: Napa, Grønlandsbanken, Bank Nordik, Brugseni, Tusass, Royal Arctic Line, Air Greenland