Tikkili Pjettursson Niaqornani inunngorpoq 5. august  1957, qatanngutigiit nukappiaqqat tallimat angajullersaattut. Titartaasartuullunilu assilialiortartuuvoq imminut ilinniartissimasoq.

Uummannami atuartuusimavoq kingusinnerusukkullu Qaqortumi Teleskolemi ilinnialerluni, sulili naammassinagu Danmarkimut nuussimavoq. Københavnimeereerluni, ilaatigut Christianiami Tikkili 1982-imi Uummannamut uterpoq.

Meeraallunili Tikkili titartaanermik annertuumik aallussaqartuuvoq, ukiorpaalunnilu titartaaneq ingerlatannaarisimavaa. Ilaatigut nipilersortartut Piitsukkut Aasianneersut nuuteeraliaasa saqqai arlallit. Aamma dronningi 1989-imi pisortatigoortumik Nunatsinnut tikeraarmat titartakkat Uummannap Kommuneata tunniussai Tikkilip titartagarai.

1990-ikkut naalerneranni qalipaaneq aallutilersimavaa, taamani borgmesteriusimasup Jens Lars Fleischerip Uummannami borgmesteriusimasut qalipaganngorlugit nivinngarneqarnissaat kissaatigimmagu. Tikkilip annoraaminermik sinilinnut qalipaasalerneranut tamanna aallarniutaavoq. Aallaqqaammut taamatut inuup assinganik misilittagaqaqqaarsimanngikkaluarpoq. Taamaalluni misissuinermini isumassarsivoq Elisibannguaq Johansenip assinga katersugaasivimmi nivingasoq qalipanniarlugu. Qalipagaa taanna maanna Uummannap Katersugaasiviani nivingavoq. Tamatuma kingorna Tikkili akuersisimavoq borgmesteriusimasut qalipaganngorlugit assilialiaralugit suliariumallugit.    

Pinngortitaq inuillu pinngortitami suliaqartut qalipagannaarilersimavai. Ukiullu ingerlaneranni surrealistiskiusumik ekspressionistiskiusunillu aamma qalipaariaaseqalerpoq, tamannalumi ulloq manna tikillugu aallutarisarpaa.

Imissutitut suliai siulliit tassaapput borgmesteriusimasut assingi kunngikkormiunullu tunissutissatut qalipagaq 2004-mi Uummannamut tikeraarmata tunniunneqartoq. Qalipagaq taanna kunngikkormiut umiarsuaanni “Dannebrog”-imi nivingavoq. Kingorna 2011-mi juuli qaammat Uummannamut Niaqornanullu tikeraaqqikkamik kunngikkormiut Tikkili imippaat qalipaassuteqqullutik. Niaqornat assiliariliaralugit qalipappai, Niaqornanullu tikeraarmata taanna tunniunneqarpoq, assullu qalipagaq taanna Niaqornallumi kunngikkormiut alutorsaatigisimaqaat!

Aamma kommunemit qalipaaqqullugu iminneqartarsimavoq illoqarfittut ikinngutigisanut tunniussassatut, tassa Helsingørimut Danmarkimiittumut aamma Granvillemut Frankrigimiittumut. Uummannami børnehjemip nunarsuatsinni tusaamasarsuit imminnut Uummannamullu tikeraaraangata Tikkilip qalipagaanik tunissuteqarfigisarsimavaat, ilaatigut fyrst Albert-imut Monacomeersumut.

Tikkilimut qalipakkatut imissutigineqartarsimasut nalitsinneersuunerusut tassaapput FN-ip generalsekretærerisimasaa Ban Ki-moon, statsministeriusimasoq Helle Thorning Schmidt aamma Naalakkersuisut Siulittaasorisimasaat Aleqa Hammond, Ilulissanut Uummannamullu septembarimi 2014-imi pisortatigoortumik tikeraarmata FN-ip New Yorkimi silap pissusia pillugu ataatsimeersuarnissaa sioqqullugu.

Qanittumi aamma Nuummi Polar Seafoodip allaffiini nivingasussanik Tikkili qalipakkanik marlunnik qalipaaqqullugu iminneqarsimavoq.

Tikkilip qalipagai amerlanerpaat inunnit namminneq pigineqartarput Nunatsinneersunit, Danmarkimiittunit aamma Frankrigimiittunit, kisianni nunarsuatsinni nunani allani aamma Tikkilip qalipagaanik piginnittoqartiterpoq.

2017-imi Tikkili 60-iliivoq, akunnaatsuliineralu nalliussiniarlugu Uummannap Katersugaasivia suliaanik saqqummersitsivoq. Tassa taanna saqqummersitaq maanna Katuami takutinneqarpoq.

Nuuppoq ...

Nutaarsiassat nalunaarutillu

Emailit allagut, mailimik nassissavatsigit ilitsersuillutalu