Gavekorti Paasissutissat

Nuup illoqarfiata qeqqani

Katuaq Kalaallit Nunaata kulturikkut illorsua, pisiniarfiit pisortallu allaffeqarfissuisa akorngini Nuup qeqqani inissisimavoq.

Illorsuup immikkuullareqisup titartarneqarnera arsarnernit qaamanerullu sermimut apummullu qinngortanerinit isumassasiaavoq.

Katuap qilaatip katuaa ateqaatigivaa, 1997-mi februaarip 15-ani atoqqaartinneqarpoq 2022-milu ukiut 25-nngortorsiorluni.

 

Katuaq - Kalaallit Nunaata Kulturikkut Illorsua Nordisk Ministerådip, Nuup Kommuneata Kalaallit Nunaannilu Namminersorlutik Oqartussat suleqatigiinnerisa kinguneqarluartup kingorna pilersinneqarpoq. Illorsuaq Katuaq i/s-imit, Kalaallit Nunaanni Namminersornerullutik Oqartussanit Nuup Kommuneanillu aningaasaliiffigineqartartoq aningaasaateqarfimmit inuussutissarsiornermik ingerlataqartumit Katuamit pigineqarpoq.

Illorsuup titartaasui

Illorsuup titartaasui tassaapput Schmidt, Hammer aamma Lassen Århusimeersut, Katuaq atuutsinneqalermat Nykreditfond-ip ukiumoortumik illunik titartaasartunut akissarsiaannik tunineqarput.

 

Akissarsitinneqarnerat nunani tamalaani illunik titartaasartut silarsuaannit soqutigineqalernerannik kinguneqarpoq, Scandinavian Design aviisimi nunarsuarmi ilisimaneqarluartumi Katuap sannaa allaaserineqarpoq, ukiullu tulliani International Yearbook Award Winning Arcgitectures-imi nammineq qupperneqarluni. Illunik titartaasartut suliffeqarfiat taanna tassaavoq Københavnimi eqqumiitsuliortut katersugaasivianni Aros-imi aamma Malmø Live-mi atuagaateqarfimmik “Den Sorte Diamant”-imik pilersitsinikut.

Katuaq illorsuaq
modelbillede af schmidt hammer lassen arkitektfirma

Illorsuaq silataanit qulaaniillu takullugu pingasunik teqeqqulik soorlu pattagiaq iluliarsuarluunniit, silataa qisummit igalaarsuarnillu sanaaq. Illorsuup titartarnerani arsarnerit maligaasiortut qaamarngullu apummut sermermullu qillaarpalaarnerat isumassarsiorfiusimapput.

Illorsuaq pingasunik teqeqqulik naqqup ataa ilanngullugu pingasunik qulereeqarpoq. Kulturikkut illorsuarmi pingasunik "illoqarpoq", Inersuaq, Inersuaaraq cafélu nigallip affaatut, kipparissutut pingasunillu teqeqqulittut sananeqarsimasut.

 

Eqqumiitsuliat

Eqqumiitsuliat pillugit oqaluttuat ugguuna tusarnaarsinnaavat. 

Nuummi Eqqumiitsuliornermik Saqqummersitsiviup oqaluttuat allataraat. Kimmernaq Kjeldsen oqaluttuuvoq. Podcasti Sialuk Productionimi Siri Paulsenimit suliarineqarput. Namminersorlutik Oqartussat aamma Kommuneqarfik Sermersooq Tips- og Lottomidlerne, Sermeq Tapiissuteqarfillu aqqutigalugit piviusunngortitsisinnaanngortimmatigut qutsavigaagut.

Buuti Pedersen

Saaffiginnittarfiup qulaani qilaaq betonimik sanaami Aningaaq Maliinalu pillugit eqqumiitsuliortup Buuti Pedersenip kigartorlugu qapiagaa takuneqarsinnaavoq.

 

Nuummi Eqqumiitsuliornermik Saqqummersitsiviup Illoqarfimmi eqqumiitsuliat pillugit oqaluttuani saqqummiunneqarpoq.

Tusarnaaruk

Isle Hessner

Katuap silataani isaariaata eqqaaniipput qaannat napparnikutut ilusillit issiaffigineqarsinnaasut eqqumiitsuliortup Isle Hessner-ip ilusilersugai. 

 

Nuummi Eqqumiitsuliornermik Saqqummersitsiviup Illoqarfimmi eqqumiitsuliat pillugit oqaluttuani saqqummiunneqarpoq.

Tusarnaaruk
Aage Gitz Johansen, eqqumiitsuliortut, eqqumiitsuliat

Aage Gitz Johansen

Eqqumiitsuliat arfineq marluk Cafétuap qulaatungaata iigartaani nivingapput Aage Gitz Johansen-ip (1897-1977) eqqumiitsuliai, Aage Gitz-Johansen aningaasaateqarfianit tunniunneqarsimasut. 

 

Nuummi Eqqumiitsuliornermik Saqqummersitsiviup Illoqarfimmi eqqumiitsuliat pillugit oqaluttuani saqqummiunneqarpoq..

Tusarnaaruk

Larry Ahkvakana

Tummeqqanippoq eqqumiitsuliaq "Red Wolfe"  Larry Ahkvakana-p, Alaskameersup eqqumiitsuliaa, North Slope Regional Corporation-imit tunniunneqarsimasoq.

Uummatip Inaa

Uummatip inaa 2022-mi Katuap ukiuni 25-nngortorsiorneranut atatillugu sanaaq Katuap 2047-mi ukiut 50-nngortorsiornerani aatsaat ammarneqartussaq.

Taassuminnga eqqumiitsuliortuupput Lars Kjær aamma Anders Zeeb.

Uummatip Inaa qisummit sanaajuvoq qilaatitut ilusilik Cafétuap iigaani nivingasoq.