Katuap aqutsisuinut sulisuinulllu ukioq 2019 pissanganarnikuuvoq. Aqutsisunut ukioq ilivitsoq siulliuvoq, ukiup 2018-ip affaata kingulliup ingerlanerani aqutsisut tallimat (pisortaq ilanngullugu) akorngini pingasut atorfimminni aallartinnikuummata. Ukioq aqutsisunut ilinniarfiullunilu nassueruteqarfiunikuuvoq.
Ukiup ingerlanerani illup ingerlanneqarnerata sulisullu atugarissaarnerisa akornanni oqimaaqatigiissaarinissaq pimoorunneqarsimavoq.
Sulisut iluarisimaarinninnerat misissorneqarnikuuvoq, tassanilu Katuami sulisut tunniusimalluartuusut suliaminnillu pingaartitsisut takuneqarsinnaavoq.
Tamanna pitsaasuullunilu uppernarsaatitut isigineqarpoq, misissuinermi aamma suut pitsanngorsaqqinneqarnissaannik tikkuussisoqarmat. Inerniliinerit amerlanersaat tupaallaatigineqanngillat, taamaattorli Katuami sulinermi unammillernartut aalajangersimasut aamma saqqummiunneqarlutik.
Tamakku tamaasa tunngavigalugit, suliffiup aaqqissuussaanera suliassallu ingerlanneqartarneri 2019-imi aallartittumik 2020-mut immikkut sammineqassasut aqutsisunit aalajangerneqarpoq.
