Kulturikkut, inuiaqatigiilerinikkut oqaluttuarisaanikkullu soqutigisalinnut sammisassaq akeqanngitsoq
2018-mi Katuaq nunatsinni kulturerput qitiutillugu immikkut sammisanik malitsigiittunik aaqqissuussisalerpoq.
Aaqqissuussinerit tamakkua immikkut aaliangersimasumik qulequtaqartinneqartarput tamarmillu kalaallit kulturiannit aallaaveqartinneqartarlutik. Qulequttat sammineqartartut qangarnitsanit aallaaveqartinneqartarput, ullumikkumut attuumassuteqarneri siunissamullu attanneqarneri ersersinniarneqartarlutik. Qulequttat Nunatta Katersugaasivia suleqatigalugu toqqartorneqartarput.
Ileqquvut kateriffittoq atuuffeqarpoq siunertaraalu Kalaallit Nunaata kulturikkut pigissaartuunera saqqummiullugu siaruarsassallugu.
Kalaallit Nunarput kulturikkut kingornussarsiaqarpugut qangarsuarnit uatsinnut ilisarnaataasunik tamannalu ullumikkut assigiinngisitaartunngorluni ineriartorpoq. Ullumikkut inuunermi kalaallip nutaaliaanerusup kulturi taassuma suussusersiniarnera nalornissutigisinnaasarpaa aammalu taamaammat pingaaruteqarpoq qanga pisimasut ileqqullu itisilernerullugit sammineqartariaqarneri. Ullutsinnut pisunut itinerusumik paasinnississaaneq periarfissittarpaa aammalu siunissamut tunaartaqarnerusumik tunngavissiisinnaalluni.
Aaqqissuussinerit ilusai eqaatsumik aaqqissorneqartarput soorlu oqalugarnerit, saqqummiinerit oqallitsitsinissamik aallarniuteqarnermit tusarnaariartut peqataatinnerinut ilusilersugaarsarlutik.
Aqqiissuussinerit naliginnaasumik akunnerni 1,5-ni sivisussuseqartarput. Katuap qulakkeerniartarpaa sapinngisamik amerlanerpaat peqataasinnaaneri taamaammallu toqqaannartumik nutserisoqarneq isumagisarlugu.
Qarasaasiakkut toqqaannartumik Ileqquvut streamerneqartarnerat NunaFondenimit aningaasalerneqarpoq
Streaming
Aaqqissuussinerit naliginnaasumik Katuap inersuaaraani ingerlanneqartarput, kisiannili stremingimik aaqqissuussisinnaaneq peqqutaalluni Nuup avataaniittut malinnaasinnaasarput.
Katuap, Kalaallit Nunaanni kultrip illorsuatut, atuuffimmini siunertaasa ilagaat inuiaqatigiit kalaallit sumiikkaluartulluunniit tamarmik sullittussaassallugit. Anguniagaq tamanna anguneqarsinnaasarpoq nipilersortartut isiginaartitsisartullu sineriammut angalaartinnerisigut.
Streaming kulturikkut kingornussavut ilisimasarpullu an nerusumik avitseqatigiissutigisinnaanissaanut periarfissanik allarluinnarnik ammaassivoq. Ileqquvut-mi aaqqissuussat 2023-mi streamernerisigut inuit nammineq qarasaasiatik imaluunniit mobilitik atorlugit malinnaavigisinnaavaat, taamaasillunilu aaqqissuussat tamavimmik nunaqqatitsinnit nuannaarutigineqarlutik takuneqarsinnaallutik.
Katuap aamma kaammattorsimavai susassaqartitsiviit katersortarfiillu nunatsinni sumi tamaniittut aaqqissuussat tamakkua saqqummiuttaqqullugit taamaasilluni illoqarfinni nunaqarfinnilu innuttaasut kateritinneqarlutik malinnaaqatigiittarniassammata. Innuttaasut qarasaasiatigut internettikkullu periarfissarissaanngitsut peqataasinnaanerinut aqqutissiuunneqassapput taamatut aaqqissuisoqarnerisigut, saqqummiussallu naammassinerini namminerissamik oqallinnermik nagitsisinnaallutik.
NunaFonden qutsavigaarput periarfissiilluarneranut.
Saqqummiinerit toqqaannartumik aallakaatinneqarnikuusut
