Aaqqissuussanik tusagassiinermut Paasissutissiinermullu akisussaasussamik, Katuaq pissarsiorpoq

 Aaqqissuussanik tusagassiisarnermut Paasissutissiisarnermullu akisussaasussamik, suleriaaseqallaqqissumik isumasiullaqqissumilllu, Katuaq pissarsiorpoq. Katuami aaqqissuussatta avammut nittarsaanissai patajaalllisarnissaat kiisalu paasissutissiiviusartuni assigiinngitsuni, ataqatigiissumik pitsaasumillu attaveqatigiinnissaq, pisortassap isumagisassarai. Atorfik ulloq naallugu suliffiuvoq, 2026-imilu juunip 15-ianni aallartissalluni.

Suliassatit pingaarnerit

• Nittartakkani, qarasaasiakkut inuit naapeqatigiittarfiini, suleqatigiinnullu siaruarterinermi saqqummiussassat inerisarnissaat aaqqissuunnissaallu – oqaasertassaat, assitalersuutissaat, assit video-llu ilanngullugit akisussaasussap isumagissavai.
• Katuaq sinnerlugu, malunnaatilimmik ataqatisiissumillu takussutissiillunilu atassuteqaqatigiissitsisinnaassaaq.
• Katuap aaqqissuussaanerani suleqataasunut tamanut, tusagassiisarnermut, nioqquteqarnermut kiisalu nittarsaanermut atatillugu, suleriaatsit aaqqissuunnissaat atuutsinneqarnissaallu akisussaaffigissavai.
• Katuamiit avammut atassutqartarneq pilersaarusiorlugulu ataqatigiissarnissaa isumagissavaa, nutaarsiassat, suliniuteqarfiit, atuisartunullu paasussutissiinerit ilanngullugit.
• Aaqqissuussanut aalajangersimasunut assitigut video-kkullu uppernarsaatissanik pilersueqataassaaq.
• Aaqqissuussinermut immikkoortortaqarfik, CaféTuaq, ataatsimeersuarnernik aaqqissuussisartut kiisalu filmertarfik qanimut suleqatiginerassapput.

Ilinnut piumasaqaatigut

• Multimedia atorlugu ilusilersuinerit, grafik/takussutissiineq atorlugit paasissutissiinerit, nittarsaanerit, assigiiaamik siammaassuinerit imaluunniit attaveqatigiissitsinerit pillugit ilinniagaqarsimassaatit imaluunniit misilittagaqarluarlutit.
• Grafik/assitassaliineq atorlugit takussutissiineq  pikkoriffigissavat kiisalu digitalimik attaveqarfiit isumannaatsumik atorsinnaassallugit.
• Qarasaasiakkut naapittarfiit nittartakkallu – SoMe/websites - atorlugit saqqummiussassanik aaqqissuussineq – digitalimillu paasissutissiisinnaanerit ilisimasaqarfigissavatit - misilittagaqarfigalugillu.
• Suleqatikkuminartoq, suliassanik aaqqissuussisartoq, suliassanillu amerlasuunik ataatsikkut malinnaasinnaasoq.
• Namminersorsinnaasoq, siunniussat anguniagaqallaqqissoq kiisalu ineriartornissaq tunaartaraalugu suleriaasilik.
•  Kalaallisut, danskisut tuluttullu allassinnaallunilu oqalussinnaasoq.
• Kalaallit kulturiat pillugu ilisimasaqarlunilu soqutigisalik

Tamakkua saniatigut makkua aamma piginnaasaqarfigeqqunarput

• Isumataarniallaqqissoq, kusanartumik saqqummiillaqqissoq, sinaakkusersuutillu iluini imassaannik inaarsiniarluni nassaarniallaqqissoq.
• Video atorlugu saqquummiinermik aaqqissuussinermillu misilittagaqarneq kiisalu soorlu kamerap saavani mikrofon-iluunniit atorlugu aallakaatitamik aqutsinermik misilittagaqarneq.
• SoMe atorlugu nuannaartorisanik algoritme-nillu malinnaasartoq.
• Kulturikkut illorsuarmi uummaariffiusumi ilaannilu ulapaarfiusartumi sulinermik nuannarinninneq.
• Google Analytics/SEO-mik atuinermik misilittagaqarneq
• Unnukkut sapaatillu akunnerata naanerani sulinissamut periarfissalik.

Neqeroorutigaagut

• Kalaallit Nunaanni kulturikkut pikialaarfiata qeqqani, isumasiullaqqissunik ataqatigiilluartumik suleqatigiiffik.
• Assigiinngiiaartunik suliassaqartarneq kiisalu piginnaasatigut ineriartornissamut periarfissalik.
• Piffiissani assigiinngitsuni sulisinnaaneq kiisalu suleqatigiinnut aaqqissuussanut peqataasarneq.
• Suliffeqarfik suleqatigiiffiulluarluni, uummaarissumik nutaanik misigisaqarnartoq.
• Sulisutut ajunngitsorsiassat arlallit: Sulisut peqatigiiffiat, nerisassatigut immikkut sulisunut aaqqissuussat, aaqqissuussanut aalajangersimasunut bilitsit akeqanngitsut, ukiup ingerlanerani arlaleriarluni katerisimaaqatigiittarnerit.
• Sulisumut inissiaq isumaqatigiissutigineqarsinnaavoq.

Uagut pilluta

Aaqqissuussinermut immikkoortortaqarfimmi maannakkut sulisut tassaapput; aaqqissuussinermut pisortaq, nipilersornermut atatillugu ataqatigiissaarisoq, misigisassanik ataqatigiissaarisoq kiisalu nioqquteqarnermi nittarsaasutut akisussaasoq. Filmertarfimmi saaffiginnittarfimmilu akisussaasut aamma aaqqissuussisarfimmut immikkoortortaqarfimmut atapput, filminik tikisitsiniarnerit kiisalu piccolo-nut filmertitsisunullu akisussaaffigalugit.

Paasissutissat allat

Piginnaanerit naapertorlugit akissarsiaqarneq.

Atorfik pillug paasissutissat allat uani pissarsiarisinnaavatit: aaqqissuussinermut pisortaq Jakob Søvndahl Skovaa eventmanager@katuaq.gl

Qinnuteqarneq

Kingusinnerpaamik qinnuteqarnissaq 29. marts 2026.

Qinnuteqaatit, pigiaasat pillugit paasissutissat kiisalu minnerpaamik paasissutissiiffiit marluk naliliineri ilanngullugit, uunga nassiunneqassapput aaqqissuussinermut pisortaq Jakob Søvndahl Skovaa ugguuna; eventmanager@katuaq.gl.

Katuaq pillugu

Katuaq suliffeqarfiuvoq pissanganarlunilu uummaariffiusoq, ukioq naallugu assigiinngitsorpassuarnik aaqqissuiffiusarlunilu amerlaqisunik isaaffigineqartuartoq. Katuami sulisut eqqumiitsuliortut, kulturilerisut, kattuffiit, suliffeqarfiit suleqatigisarpaat kiisalu Nunatsinniit nunaniillu allaniit tikeraartut allarpassuillu atassuteqarfigisarlugit.

Katuaq aningaasaateqarfittut suliffeqarfiutilittut ingerlavoq, pingaarnertut Kalaallit Nunaata Kulturikkut Ilorsua aallaavigalugu, kulturilerinermi atassuteqaqatigiiffigisat suleqatigisartakkallu peqatigalugit Kalaallit Nunaanni nunanilu allani kalaallit kulturiata saqqumilaarnissaanik sulissutiginnittoq. Katuaq nammineq ingerlataminik filmertarfeqarpoq café-qarlunilu, kiisalu ataatsimiiffissatut ataatsimeersuarfissatullu pitsaanerpaamik, ullorissanik tallimanik nalilikkamik, periarfissaqartitsilluni. Katuamik aningaasaliisartut tassaapput  Namminersorlutik Oqartussat kisialu Kommuneqarfik Sermersooq. Taakkua saniatigut arlalinnit Katuaq aningaasaliiffigineqartarpoq, Kalaallit Nuanaanni tamani kulturikkut aaqqissuussanik assigiinngitsorpassuarnik tapersersuisartunit.