Tiu - nipilersortartut
TIU tusarnerluinnartunik nipilersortut misigisaqarfigikkit, erinarsortuat Pernille immikkuullarissumik erinagissoq pikkorilluinnartunik nipilersortulerluni saqqummersitartik nersualaarneqartoq ”Nuunneq” kiisalu kingullermik saqqummersitartik ”Qalipaatit inugaannut” tigulaariffigissavaat. Erinarsuutaat inuummarissinartut misigissuseqarpaluttullu asanninnermut nuannaarnermullu tunngasut ilaat nikallunganermut tunngasuupput.
Kalaallit Nunatsinni Danmark-imilu amerlasooriaqalutik TIU-kkut tusarnaartitsisareerlutik nipilersoqatigiillaqqinnerat assut nersualaarneqartarpoq, kingullermillu Canada-mi Alianait Arts Festival-imi peqataagamik tuluttut ima nersualaarneqarput: ”A lovely Magical Performance at Alianait”. Nipilersoqatigiit tusarnaartitsinerminni immersuillaqqinnermikkut tusarnaartut qullipitissinnaasarpaat, Pernille-lu alutornartumik inuummarilluni nipilersukkanik ilisarititsigaangami qungujutsitsillunilu illalaaqattaartitsisarpoq.
