Air Greenland-imi avammut tuniniaanermut pisortaq tunuliaqutsiilluni aningaasaliisarnissaq pillugu imatut oqaaseqaqrpoq:
Air Greenland-imit aallaqqaataaniilli Katuaq tapersersorneqartarsimavoq angujumallugu Kalaallit Nunatsinni piorsarsimassutsikkut ingerlanneqartut nunatta sinneranut aamma siammartiterneqarnissaat. Air Greenlandimimmi qangaammalli inuiaqatigiinni akisussaaqataanermik ingerlatsineq ileqquusimavoq, taamaattumillu piorsarsimassuseq tapersersoratsigu tamanna isumaqarpoq pasinnittugut piorsarsimassutsimik aallaaveqartunik misigisat tassaajuarmata apeqqutissaqartitsillutillu ineriartortitsisinnaassuseqartut – piginnaanerit pingaartut, eqqarsaatigigaanni nunarsuarmi nunattalumi iluani qanoq avinngarusimatigaluta inissisimanerput.
Katuallu pisortaa Julia Pars oqarpoq:
Nuannaarutigaarput Air Greenland Katuamit piorsarsimassuseq aallaavigalugu ingerlanniakkatsinnut tapersersuerusummat. Inuussutissarsiornermimmi ingerlatsisut piorsarsimassutsimik tapersersuiumanerat uatsinnut pingaartuuvoq. Taamammi ittoqarneratigut aaqqissuussanik amerlanerusunik sinerissamut aamma ingerlatissinnaasatsinnik kivitsisinnaatitaalerpugut. Ukiummi affaani siullermi Nuummi ingerlanne-qartut akornanni aaqqissuuussat 10-t nunatsinni illoqarfinnut assigiinngitsunut ingerlatereersimalerpagut. Tamanna anguneqarsinnaasimanavianngikkaluarpoq tapersersuisorpassuatsinnit, soorlu Air Grenlanditut ittunit allanit, ikorfartorneqarsimanngikkaluarutta, taannami ukiut tamaasa aaqqissuussatta sinerissap ilaanut aamma anngunnissaat isumannaarumallugu iliuuseqarluartarsimavoq.
Katuaq ukioq manna ukiunik 20-inngortorsiorpoq tamannalu malunnartissimallugu tamanut ammasumik ulloq 15. februar aaqqissuussinikkut, marlunnik isiginnaartitsissutinik takutitsillunilu angalatitsinikkut, tusarnaartitsinernik arlaqartunik ingerlatsinikkut aammalu Katuaq pillugu atuakkamik saqqummiussaqarnikkut. Atuakkamilu ilaatigut sammineqarpoq qulequtaq ingerlajuartuusoq, tassalu sooq nunamut pingaartuunersoq piorsarsimassutsimut illoqarnissaq.
Katuamullu aningaasaliisartut, Air Greenlandip avataatigut, makkuupput:
Nunafonden, Grønlandsbanken, Brugseni, TelePost, Permagreen, Banknordik, NAPA, Royal Arctic Line. Katuallu ingerlanneranut tapiissuteqartartuusut tassaapput: Kalaallit Nunaanni Namminersorlutik Oqartussat aammalu Kommuneqarfik Sermersooq.