Katuap 2016-imi angusai amigartoorutit 356 t.kr.-upput, missingersuutigineqarsimagaluarluni 16.t.kr.-nik sinneqartooruteqarnissaq. Siulersuisunilli angusat naammaginartutut nalilerneqarput.
Katuaq 2016-imi 356 t.kr.-nik amigartooruteqarpoq missingersuttaasimagaluarluni 16 t.kr.nik sinneqartooruteqarnissaq.
Katuaq 2016-imi 35,7 mio. kr.-nik kaaviiaartitsivoq, Piorsarsimassuseq aallavigalugu aaqqissuussinerit, filmertitsinerit ataatsimeersuarnerillu katillutigit inunnit 100.000-it miss. peqataaffigineqarsimapput. Taaneqartullu saniasigut inuppassuit café-mukaasarputtaaq.
2016-imi Katuaq aaqqissuussanik 4-nik sinerissamut angalaartitsipput Nuup avataatigut illoqarfiit/nunaqarfiit assigiinngitsut 8-t tikinneqarsimallutik. Illoqarfiillu ilaat arlaleriarlutik tikinneqartarsimapput.
Katuap aningaasaliissartui, Kalaallit Nunaanni Namminersorlutik Oqartussat aammalu Kommuneqarfik Sermersooq 2016-imi Katuap ingerlanneqarneranut katillugit 9,6 mio. kr.-nik aningaasaliipput.
Angusat, amigartoorneqalaaraluartut, naammaginartutut nalilerneqarput.
Siulersisuni siulittaasoq Uju Petersen oqarpoq:
” Katuaq2016-imi amerlasuunik pisoqarfiusimavoq: nipilersornernik, qitinnernik, isiginnaartitsinernik, saqqummersitsinernik, filmertitsinernik oqalogiartitsisarnernillu akuleriiaagaasunik imaqartunik. Kulturimik aallaveqartumik ingerlanneqartut inunnit 32.0000-init orninneqarsimapput filmertitsinerillu inunnit 47.000-init orninneqarsimallutik. 2016-imi kaaviiaartitat 35,7 mio. kr-usut aatsaat taamak qaffasitsigisimapput, tamatumunngalu pissutaanerpaasimavoq, cafèmik, ataatsimiinnerni/ataatsimeersuarnerni filmertarfimmilu peqataasarsimasut amerlisimanerinik.”
Pisortaq, Julia Pars oqarpoq:
”Katuap peqatigiiiffinnik, kulturilerisunik, suliffeqarfinnik, pisortanik inuinnarnillu minnerunngitsumillu tapiissuseqarlutillu aningaasaliisartunik suleqateqarluarnerata malitsigisaanik, 2016-imi pisoqartitsisarneq qaffasissorujussuusimavoq. Pisartulli amerlaneri ammalu sulisut pingaarutillit iluini taarsiinerit angusatigut apparsaataasimallutik.”
2016-imi Katuaq 20-inik qaammammusiaqartitaasunik akunnermusialinnillu 48-nik sulisoqarsimavoq tassa inuit 50-it ukioq naallugu sulisutarineqarsimasutut naleqartumik.
Siulersuisut katitigaanerat
2016-imi siulersuisut imatut katitigaapput:
- Uju Petersen, Siulittaasoq, Kommuneqarfik Sermersuumit toqqagaasoq
- Siulittaasup tullia Bodil Marie Damgaard, Namminersorlutik Oqartussanit toqqagaasoq
- Anna Heilmann, Visit Greenlandimit toqqagaasoq
- Sørine Steenholdt, Eqqumiitsuliornikkut Pinngorartitsisut Ingerlatsisullu (EPI – paraplyorganisation) toqqagaat
- Rune Collin, Katuami sulisut sinnerlugit ilaasortaasoq
Ukiumoortumik ataatsimiinnermi Arnakkuluk Kleist siulersuisuni ilaasortaalerpoq Bodil Marie Damgaard taarserlugu, taanna ukiuni pingasuni Katuap siulersuisuini issiareerluni tunuarumammat.