Ukioq mannalu tallimassaa pikialaartitsisoqarmat inuit 1.000-it missingi peqataapput, tamannalu ukiumut siuliusumi sanilliukkaanni 20%-inik amerlanerusunik peqataaffiulluni. Qooqquni pikialaartitsineq kalaallit kulturikkut ileqquinik katersortitsivoq aammalu Canadamit Nunaniillu Avannarlernit nipilersortartunit peqataaffigineqarlunittaaq. Ilaqutariippassuillu periarfissaq kulturi qitiutillugu ataatsimoorneq ataatsimoorluni misigisaqarnissaq atorluarpaat.
KANGERLUMMI ATAATSIMOORNEQ
Ukioq manna Qooqquni pikialaartitsinerup qulequtarivaa ”Sila”, taggit silamut, eqqarsarsinnaassutsimut aammalu nunarsuarmi aaqqissuussaanermut sammisunik eqqartuinerni atorneqarsinnaasoq. Taamatut ateqartinneqarpoq, silami pinngortitami ingerlanneqarmat, nunami toqqamik oqummiussassanik pissarsiorfiusinnaasumi. Saniatigullu aamma tarneq, pisut assigiinngitsut tunngavigalugit ilisimariikkat periutsillu nutaat atorlugit, immerneqarpoq.
Katuami pisortaq Arnakkuluk Jo Kleist oqaluttuarpoq: ”Sammisatsinni aamma ataatsimoornermik nukittunerulersitsinissamik kissaatigisarput anguneqarpoq. Pinngortitamiinnermi annertuumik ataatsimoornermik misigisimatitsivoq. Taamaattumillu pisussatut aaqqissuussatsinni qitiutippagut ataatsimoorluni ingerlanneqarlutillu sammineqarsinnaasut.
Ikumalaartitarlu ungullugu tallimanngornermi arfininngornermilu erinarsorlutalu immitsinnut sammigatta, malunnaqaaq, eqqumiitsuliortut najuuttut, meeqqat inersimasullu akornanni suut tamaasa akimorlugit ataatsimoornermik misigineq nukittooq pilersinneqartoq. Qilanaaraarpullu ukiup tulliani Qooqquni pikialaartitsinermi anersaaq nangeqqissallugu”.
ERINARSUUT NUTAAQ IMMIKKUULLARILLUINNARTUNIK SULEQATIGIINNERMUT PIGITINNEQARTOQ PILERSINNEQARTOQ
Ukioq manna Qooqquni pikialaartitsinermut nipilersortartut Ulf Fleischer, Thelma Kajsdóttir Lyberth aamma Teitur Magnússon, qaaqquneqarlutik peqataatinneqarput co-lab-imik taallugu suleqatigiissinneqarlutik.
Aqqissuussinermut pisortaq Camilla Høg oqaluttuarpoq: ”Taamatut ingerlatsinitsinni misissorusupparput, qanoq pisoqassasoq erinarsortartut pingasut assigiinngitsorujussuit suleqatigiissinneqarpata. Tassami Thelma, Ulf aamma Teutur immikkut tamarmik nipilersortartutut/erinarsortartutullu sassartarnermi assigiinngitsorujussuupput ukiumikkullu nikingangaatsiarlutik. Ammasuunerat, akunnerminnilu imminnut ataqqeqatigiinnerat takullugu tiguartinnartumik nuannersuuvoq. Tuppallernaqaarlu suleqatigiillutik erinarsuusiartik ”sila” appimmassuk, Qooqquni avataangiisit kusanaqisut aallaavigalugit ingerlanneqartumut pigitilluinnagartik.
INGERLATSEQQIISARNEQ, ISUMASSARSIORTITSINEQ KATERSUISARNERLU PILLUGIT SULEQATIGIISSITSINEQ
Ukioq manna suleqatigiissitsinermi ullaakkut yogartitsisoqarpoq, Kalaallit Nunaanni Timersoqaitigiit Kattuffiat (GIF) aaqqissuisoralugu ujarlernertalerlugu arpatsitsisoqarluni.
Peqatigiiffik Qajaq Nuummeersut nunatsinni inuussuttut pissartanngornikut qaannamik takutitsisinneqarlutik, eqqumiitsuliortut peqatigiiffianni Ajagaq-mi eqqumiitsuliortut kusanartuliaminnik saqqummersitsisinneqarlutik, GEUS-imit nuna pillugu saqqummiussisoqarluni, nunatsinnit Canadamiillu inngertartut takutitsillutik, nunatsinni naasut, meeqqat eqqumiitsuliaat aammalu atueqqinneq aallaavigalugu eqqumiitsuliorneq pillugit sammisaqartitsisoqarluni.
Ukioq mannalu Qooqquni pikialaartitsinermi siullerpaamik isiginnaartitsisoqarpoq. Isiginnaartitsissusiarlu ilaqutariinnut naleqqussagaasoq Danmarkimi Asterions Hus-imit suliaasoq Shakespearip asanninnilikkersaarsuiaanit ”Romeo og Julia”-mit aallaveqartoq inunnit 200-nit alutorineqaqaluni isiginnaarneqarpoq.
Ukioq maanna nipilersorluni tusarnaartitsinerni peqataapput:
Hans-Ole Amossen, Katuaq Band, Nuka-Alice Lund, Thelma Kajsdóttir Lyberth, Teitur Magnússon (ISL), Sylvia Cloutier (CAN), Ulf Fleischer, Titarnek, QF Co-lab-imillu taallutik suleqatigiissut, silaannarmi isiginnaartitsivimmi nuannarineqaqalutik naggasiisuusut.