Mike-p titartaaneq nuannariuaannarnikuuaa. Meeraanermini sapiitsuliortartut biilillu samminikuuai, ilinniarnermili nalaani ilusilersuisutut isumassarsiat kiisalu illut allallu sanaartugassat, kisianni aamma eqqumiitsumik paasiuminaatsumillu ilusillit kiisalu inuit titartarnikuullugit. Titartagai tamatigut qalipaatigissuunikuupput imaluunniit qernertut qaqortumut titartagaasarnikuullutik.
Mike-p qalipakkamini avatangiisini aammali meeraanerminit eqqaamasani aallaavigisarpai. Tamakkua tassaasinnaasarput sanaartukkat, angallatit, imaluunniit suulluunniit nunatsinni INUIT pingaartissimasaat. Mike-p eqqaamavaa, borgmesteriunikup aperimmani; MIKE, qalipakkanni kusanartuni qalipaatigissaartuni blokkersuit qaqortut kusanaatsut titartarneq ajorpigit?? Tassungalu akivoq; tamakkua nuannersuinnarnik eqqaamasaqarfigaakka, uagut tamarmik imminnut ilisarisimasut akornanni peroriartoratta, meeqqallu tamarmik silami pinnguaqatigiittarlutik – eqqaamasat NUANNERSUINNAAT – aamma tamakkua oqaluttuarisaanitsinnut, ineqariaatsitsinnut maanilu init qanoq isikkoqarnerinut eqqaassutissaaginnaallutik. Arlaanni inuit ilaata Mike ujaqqanik milloorlugu suaartarpoq TUPILAAT ulorianartut tiaavuluullu suliarigai, taamaammallu saqqumersitsinera matuneqartariaqartoq, tassunga Mike akivoq, nammineq tupilliani asannittumik titartagaasut ajunngitsumillu nukissaliisussatut titartagaasut.
Mike qalipagassiani mikisuni, angisuuni angisoorujussuarnilu qalipaasarnikuuvoq. Kiisalu iilersarissanik, ujaqqanut, niaqqut saarnginut nassunnullu qalipaasarnikuulluni. Qalipagai qalipaasersorluakkat amerlaqisut kipparissumik qernertortaqarput – isiginnittumut immersugassiamik. – unillatsiarnissaq pisariaqartarpoq, aammali takorluukkat ingerlateqqikkusunnatarlutik. Mike atuagassiani assigiinngitsuni ilanngutassiarineqartarnikuuvoq eqqumiitsuliaasalu ilaat gymnasiani meeqqallu atuarfiini soraarummeerniutigineqartarnikuullutik.
