Piumassutsiminnik suliaqartartut nunanit allaniit, aammalu Foreningen Grønlandske Børn-meersut aasarsiortitsiarnerini assilisat Kommuneqarfik Sermersuup illoqarfiini arlalinni assilisaapput. Assit meeqqat sammisaqarnerini assilisaapput siunertarineqarluni pinnguarneq, ilinniarneq ataqatigiinnerlu.
Saqqummersitsineq ammaanersiorneqassaaq ulloq 9. maj nal. 17.00 Katuami Nuummi
Assinik saqqummersitsinermi ammaalluni oqalugiassaaq Ujo Petersen, Heidi Lindholm aammalu Thomas ”Tyt” Mogensen Foreningen Grønlandske Børn-meersut imeruersaatinik tamulugassaminernillu sassaallerumaarput.
Foreningen Grønlandske Børn pingasoriarluni aasarsiortitsisimavoq Kommuneqarfik Sermersuumi meerartaanut. Ukioq 2015-mi Ittoqqortoormiini pisimavoq, ukiorlu 2018-mi Ittoqqortoormiini Paamiunilu aasarsiornerit ingerlanneqarsimapput.
Foreningen Grønlandske Børn-p allaffiani pisortaq Nike Berthelsen oqarpoq
”Assinik saqqummersitsinermi takutsikkusupparput qanoq pingaaruteqartigisoq meerartagut ataqatigiilersitsinermik aammalu aasarsionermi allaanerulaartumik nuannersumik misigitissallugit. Meeqqat imminnut aammalu piumassutsiminnik suliaqartunut nunanik allaninngaaneersunut ataqatigiilertarnerat siunissamut qanittunmut ungasissumullu sunniuteqartussaavoq. Nalilersuisarnerit takutippaat meeqqat peqataasimasut oqaatsinik ilikkapallattartut, ilikkajanerulersartut kammalaatitaartortartullu. Ittoqqortoormiini 2018-mi aasarsionermi peqataasut 73 %-ii imminnut nalilersimapput tuluttut pikkorinnerulerlutik”
Nike Berthelsen-p aamma eqqaavaa aasarsiortitsisarnermikkut tapersersorneqarluarlutik.
”Kommuneqarfik Sermersooq suleqataalluartarpoq, suliamut tapiisanngikkaluarpata aasarsiortarnerit taama annertutigisassanngikkaluarput”
Aasarsiortitsisarnerup Kommuneqarfik Sermersuumi siunertaa:
Illoqarfinni nunaqarfinnilu mikinerusuni aasaq takisinnaasarpoq meeqqat ilaanut, tassami atuarfik, klubbi timersortarfillu aasaanerani matoqqagajupput, amerlanngitsut periarfissaqarput najugartik qimallugu aallalaarnissaminnut. Taakkununnga aasarsiortitsisarneq/Sommercamps neqeroorutaavoq.
Susassaaleqisinnaaneq pinnguarnermik timersornermillu, nerisassanik takornartanik, erinarsorneq nipilersonermillu, kammalaatitaartornermik, nunani allaneersunik naapitsineq, oqaatsinillu ilinniarnermik taarserneqartarpoq.
Piumassutsiminnik suliaqartut nunanit allaneersut soorlu Taiwan, Canada, Grækenland Mexivo-miikku tikittarput aaqqissuussanullu ikiuulluti meeqqanut iluaqutissanik suliaqartitsisarput.
Assilisat saqqummersitat assiliisartunik Ena Kurtagic Granulo, Dagmara Wojtanowicz assilisaapput.
Saqqummersitat nivingassapput 9. maj-6. junip tungaanut