Kulturikkut aaqqissuisartut Katuami maajip aappaaniit sisamaat ilanngullugu isumasioqatigiipput tassanilu kulturilernerup ineriartornissaanut timitaliinissamik siunnersuusiortoqarpoq.
Nunatsinni kulturikkut aaqqissuisartut qulequttanik ulluinnarni suliaannut tunngassutilinnik eqqartueqatigiipput ilanngullugulu qaqilerneqarput siorna novembarimi Naalakkersuisup Peter Olsenip Kulturi pillugu isumasioqatigiisitsineraniit innersuussutigineqarsimasut 39-t. Innersuussutit taakkorpiaat isumasioqatigiinnermi uani sammineqarput pingaarnersiorneqarlutillu.
Innersuussutit pingaarnersiukkat arfineq marluk taakku maajip sisamaani Naalakkersuisumut Peter Olsenimut saqqummiunneqarput timitalernissaanullu siunnersuuteqarlutik. Naalakkersuisoq kulturilerisullu eqqartuilluarput ingerlariaqqinnissarlu anguniarlugu ataatsimeeqatigeeqqinnissaq itinerusumillu pilersaarusiornissaq isumaqatigiissutigineqarpoq.
Kulturikkut suliaqarneq eqqumiitsuliornerlu inuiaqatigiinnut eqqumiitsuliortunullu pitsaasumik ineriartortinnissai anguniarlugu suleqatigiinnissaq peqataasunit tamanit qilanaarineqarpoq.
Nunatsinni kulturikkut aaqqiissuisartut isumasioqatigiinnermi peqataasut uangaanneerput: Katuaq, Taseralik, Nunatta Isiginnaartitsisarfia, NAPA, Avannaata Kommunia, Kommuni Qeqertalik, Qeqqata Kommunia, Kommuneqarfik Sermersooq kiisalu Kommuni Kujalleq.