Ukiuni marlunni, tassalu ukiuni 2018 – 2019-imilu, GrønlandsBANKENip piorsarsimassuseq ukiumut 175.000 kr.-nik tapiissuteqarfigisarniarpaa taamatullu iliornermigut Katuaq periarfissillugu Kalaallit Nunaanut tamarmiusumik iluaqutaasussamik piorsarsimassutsimut sammisunik aaqqissuisarnissaanut.
GrønlandsBANKENimi allaffissornermut pisortaq Carsten Th. Pedersen aningaasaliissutissat pillugit oqarpoq:
”2011-imiilli GrønlandsBANKENimit piorsarsimassuseq tapersersortarsimavarput, taamatummi iliornikkut inuiaqatigiinni inuppassuit malunnaaatilimmik sunniuteqaqataaffigisaratsigit. Katuap ingerlattagai meeqqanut, inuussuttunut inersisimasunullu Kalaallit Nunaannut iluaqutaasumik annertuumik siammaanneqartarput, taamaattumillu Katuamik tapiissuteqartarnissamik isumaqatigiissuteqaqqippugut.”
Kulturillu Illorsuani Katuami pisortaasoq Julia Pars GrønlandsBANKENip tapiissutiginiagai pillugit oqarpoq:
”Uatsinnut nuannersuuvoq GrønlandsBANKENip kulturimut sammisunik suliniutitsinnik tapiissuteqarnikkut tapersersueqqinnera. Uatsinniillu pingaartipparput taamatut suleqatigiinnerup illugiinnut iluaqusiinissaa. Katuarmi aningaasanik pissarsivoq siammasinnerusumik sulinissaminut atugassaminik amerlanerusunillu aaqqissuisinnaanissaminut , GrønlandsBANKENilu aningaasaliinermigut Kalaallit Nunaata iluaqutissaanik suliniuteqarnernut periarfisseeqataavoq.”