Katuaq ukiunik 20-inngortorsiornermut atatillugu atuakkamik saqqummiivoq. Tassani Katuap suleqataasa, aningaasaliisartui, tunissuteqartartut allallu atuisartut nassuiarpaat kulturimut illoqarneq sooq pingaartuunersoq imminnullu qanoq isumaqarnersoq. Katuamilu Siulersuisuni siulittaasuusoq Uju Petersen oqarpoq:
“Atuakkap paasinarsitippaa Katuaq ingerlatsisarnermigut qanoq ineriartortigisimasoq aammalu kulturip illuanik peqarneq qanoq pingaaruteqartigisoq. Katuaq aallarteqqaarnerminiilli assigiinngitsorpassuarnik misigisaqartillugit katersortarsimavai. Katuaq aamma naapittarfinngorsimavoq, innuttaasunut Cafétuamik atuisartunut aammalu suliffeqarfinnut Katuaq ataatsimiititsisarfittut ataatsimeersuartitsisarfittut ingerlatsiviusalersimalluni. Taamatut siammasissumik atorneqarsinnaassuseqarneq Kalaallit Nunaannut pitsaasuuvoq aammalu taamak atorsinnaaneq nunani avanarlerni nipilersortarfinni tusarnaartitsiarfinnilu ingerlatseriaatsitut takusaalluni. Isumaqarpunga atuagaq aqqutigalugu oqariartuutigineqartut takutikkaat, Katuap taamak ingerlatsinini iluatsilluarsimagaa”.
Katuami pisortaq, Julia Pars ilassuteqarluni oqarpoq:
“Isumaqarpunga pingaartuusoq Katuap tamanut kulturimut illuunera, meeqqaniit inersimasunut aammalu tassaanera siammasissumik aaqqissuisarfik ilaatigut ikittuinnarnut saaffiginnittunik ilaatigullu siammasissorujussuarnut saaffiginnittunik misigisaqartitsisarfiusoq. Katuami pingaarteqaarput tamatigoortuunissaq isumaqarpugullu ajornanngitsoq kalaallit kulturiannik aallaaveqartunik misigisaqartitsisinnaanerit illullu ataatsimiittarfittut ataatsimeersuartitsisarfittullu atorsinnaanera suleqatigiissillugit imminnut tasiortunngortinnissaat. Isumaqarpungalu tamanna atuakkami uppernarsaaserneqartoq”.
Atuakkap naqitertinneqarnera Nunafondenimit tapiiffigineqarpoq, atuagarlu akeqanngilaq maannalu ingerlatsivinnut suliffeqarfinnullu nassiussuunneqarluni aammalu Katuami saaffiginnittarfik aqqutigalugu piumasunit pissarsiarineqarsinnaavoq.
Atuagaq aajuk.