Decembarip pingajuani Nunatsinni Inuit Innarluutillit Katuffiat (NIIK) nunarsuaq tamakkerlugu innarluutillit ulluanni Katuaq tikinneqarsinnaasutsialattut akissarsitippaa. Akissarsiaq tikinneqarsinnaasutsialak isumaqarpoq illorsuaq innarluutilinnit imaluunniit pitsorluttunit tikinneqaruminartoq.
”Toqqagaanissinnut peqqutaavoq tikinneqaruminarsarnissaa eqqumaffigigassiuk. Suli pitsanngorsagassanik peqarpusi. Tikikkuminarsaanissamut ukkatarisaqarnersi tunuliaqutaralugu ukioq manna akissarsitinneqarpusi – ilaatigut matut nammineq ammartartut pissutigalugit Katuaq kikkunnit tamanit tikinneqarsinnaaneranut isumalerujussuupput”, NIIK akissarsititsinerminut tunuliaqusersuinerminni taama allagaqarput.
Tikinneqarsinnaasutsialammut Katuap akissarsitinneqarnini nuannaarutigalugulu tulluusimaarutigaa illorsuullu pitsanngorsarnissaanut pissutsinullu malinnaajuaannarnarnissani neriuutigaa, kikkunnit tamani tikikkuminarnerusunngorneruniassammat.
”Tikikkuminartutsialammut akissarsitinneqarnerput isumalerujussuuvoq. Katuap illorsua kikkunit tamanit tikikkuminarsarneranut suliarisagut pillugit maluginiarneqarpugut tamannalu qujanarpoq. Aamma soorlu assersuutigalugu paarlersuarmi tusarnaartitsinerni issiaffissaliisalernikuuvugut innarluutillit pitsorluttullu pitsaasumik igalaallu saaviniigatik toqqissisimallutik issiasarnissaat anguniarlugu ,” Katuami pisortaq Ivaaq Kriegel oqarpoq nangillunilu;
”Pitsanngorsaajuaannarnissarput ilisimaaraarput, tamannalu siunissami pingaartinnerusalissavarput. Illorsuaq 1997-imi pilersinneqarpoq taamanilu tikikkuminarnerunissaq eqqumaniarfigineqarsimanngilaq – assigiinngitsualunnik pitsanngorsagassaqarpoq tamakkulu tulleriaaneqarumaarput”, Ivaaq naggasiivoq.
Katuap illorsuata suliarineqarnera kikkunnit tamanut ammasuunissaa eqqarsaatigineqarnikuuvoq, filmeriassagaani, neriartussagaanni, saqqummiisuni peqataassagaanni tusarnaariassagaanniluunniit majuartarfinnik atuiffiusariaqanngitsutut suliaanikuulluni.
