Gavekorti Paasissutissat
22. november 2024

Martin Brandt Hansen, amerlanerit isiginnaagassiami quiasaarusiaminngaanniit Labrador Kangiani ilisimasaat, isiginnaartitsisartumiit Kalaallit Nunaanni eqqumiitsuliornermut ilinniartuniit qaffasinnerpaami ilinniagaqartumut alloriaarteqarujussuarpoq. Naalagaaffeqatigiinni qaffasinnerpaat ilaanni ilinniakkani tunuliaqutaralugu Kalaallit Nunaat eqqumiitsuliani aqqutigalugit nittarsaakkusuppaa.

 

Det Kongelige Danske Kunstakademiimi bachelor masterilu naammassereerlugit eqqumiitsuliortut silarsuaani ilisimaneqarlualeriartorpoq. Suliai suliffeqarfinnut kiisalu eqqumiitsulianik katersuisartunit pisiariortorneqarlualereersut saqqummersitsisarnermini maluginiarneqarlualereerput.

Kalaallit Nunaat qitiutillugu

Martinip eqqumiitsuliai kalaallinit siuaasaanut attuumassutilerujussuupput. Annerusumik qiperugakkanik inississukkanillu suliaqartarpoq, tupilaat kalaallillu kiinarpaanik oqariartuutilinnik kiisalu nunat kippasissuneerpalaartunik akoorlugit suliaqartarpoq. Taamaalilluni Kalaallit Nunaata nunarsuarmiunut allanut akulerunnera oqaluttuanngorlugu pilersittarpaa.

 

Tupilaap takussutissatut oqaluttuassartaa ilisimaaraa, tamatigungajak kalaallinit qallunaanut tammajuitsussatut suliaasarpoq, qallunaat kalaallit toornaarsuinik kiisalu oqaluttuaatitoqaanik takorluuerusuttunut suliaasarlutik. Martinip takutitassiassatut eqqumiitsuliaani ullumikkut Kalaallit Nunaata aamma qanga kalaallit kiisalu oqaluttuaatitoqaasa kattusimaneranik oqaluttuamik pilersitsivoq.

 

”Suliat uku piumaneqartorujussuupput. Kisianni Kalaallit Nunaanni saqqummiunneqaqqaartinnagit tunerusussimanngilakka,” nunamini saqqummersitserusuttoq Martin oqarpoq.

Siunissamut takorluuineq

Martinip suliai nunat assigiinngitsut akornanni piumaneqarluaraluartut, Kalaallit Nunaanni eqqumiitsulioriaatsip siuarsarnissaanut inerisaaqataarusunnermit ersarissumik takorluugaqarpoq. Kalaallit inuusuttut eqqumiitsuliortartut nutaaliornissaannut isumassarsitikkusuppai ileqqoq malittarineqartoq tunukkiartorlugu.

 

”Eqqumiitsuliakka inunnut suminngaanneerfigisanneerusunut takutikkusuppakka. Pissutigalugu eqqumiitsuliarisanni kalaalerpallassinnaasunik ilisarsilluarsinnaammata,” Martin nuannaajallalluni oqarpoq.

 

Ullumikkut Martin Københavnimi eqqumiitsuliornermut sullivimmini sulivoq, saqqummersitsitassat nutaat piareersaasiorpai, kisiannili uummataa Kalaallit Nunaanniittuarpoq. Sumiiffinni eqqumiitsulianik takutitsivinni sunneeqataasinnaanissani kiisalu kalaaleqatini isumassarsitinnissai neriuuteqarfigai.

Eqqumiitsuliortoq Kalaallinit tulluusimaarutigineqarsinnaasoq

Martin Brandt Hansen eqqumiitsuliortutut piginnaasaqaannarani Kalaallit inuusuttaannut maligassaavuttaaq. Kalaallit Nunaat nunarsuup ilaanut qanoq tunniussaqarsinnaatiginersoq takutikkusuppaa aammattaaq allat nutaaliorsinnaanerannik isumassarsitikkusuppai.

 

Kalaallit Nunaat eqqumiitsuliortumik tulluusimaarutaasinnaasumik peqalerpoq. Kalaaleq eqqumiitsuliortoq qaffasissumik ilinniagalik eqqumiitsuliani aqqutigalugit Kalaallit Nunaat nunarsuup ilaanut nittarsaassisoq.

Innuttaasunit tiguneqarluarpoq

Eqqumiitsuliaminik ELASTOMANIA-mik qulequtaqartumik saqqummersitsinermut atatillugu ammaanersiornermini Martin Brandt Hansen nuummi innuttaasunit tigulluarneqarpoq. Uuntritilinnik ikinnerunngitsut ammaanersiornermut najuukkiartorput, tamannalu Martinip ilimagisimangikkaluarpaa.

 

”Takorloorsimanngikkaluarpara inuit taama amerlatigisut peqataajartornissaat. Tupaallannarpoq ELASTOMANIA-p ammaanersiorneranut taama amerlatigisut aggiammata,” Martin Brandt Hansen oqarpoq naggasiillunilu:

 

”2019 kingornali nunat assigiinngitsut akornanni eqqumiitsuliornermik katersugaasiviini saqqummersitsisarpunga suliakkalu nunani assigiinngitsuni eqqumiitsulianik katersisartunit tunisareerlugit. Taamaammat nuannaarutigisorujussuuvara kiisameerluni eqqumiitsuliakka kalaalerpaluttut kalaallit innuttaasuinut takutissinnaagakkit”