Indigenous Electronic Music Festival

Indigenous Electronic Music Festival tassaavoq Nuummi elektroniskimik nipilersornermut festivali nutaaq, nunaqavissunit siulersorneqartoq kalaallinillu Nunavimmeersunillu eqqumiitsuliortunik katersuuffiusoq.

 

Festivalip nunaqavissut qangali nipilersoriaasaat kultuurikkullu saqqummeroriaasii ullutsinni elektroniskimik nipilersoriaatsitigut naapitippai. Ilaatigut elektroniskimik nipilersornerit, qilaatersornerit kiisalu isiginnaagassiat nipilersornerillu ataatsimoortut takutillugit saqqummiussiffigineqassaaq.

 

Festivalip Kalaallit Nunaanni Nunavimmiilu eqqumiitsuliortut akornanni suleqatigiissutit nutaat attaveqaatillu ukkatarai, peqatigitillugulu Nuummi qitiusumik aallaaveqalernissamik pilersitsilluni, tassanilu nunaqavissut nipilersoriaasiat kultuuriallu nutaaliaasumik ilutsitigut naapiffeqarsinnaalernissamut periarfissaqalissaput.

 

Ilaqutariinnut tusarnaartitsineq

 

Arfininngorneq 26. september kl. 14.00–15.00 ilaqutariinnut akeqanngitsumik tusarnaartitsisoqassaaq, ukioqatigiinnut tamanut ammasumik.